කාලගුණ විද්‍යා දෙපාර්තමේන්තුවේ ස්වභාවික විපත් පිළිබඳ පූර්ව අනතුරු ඇඟවීමේ මධ්‍යස්ථානය විසින් තද වැසි සහ අකුණු පළිබඳ විශේෂ අවවාදාත්මක නිවේදනයක් නිකුත් කර තිබෙනවා.
අද පස්වරු 5ට මෙම නිවේදනය නිකුත් කර ඇත්තේ ලබන 17 වනදා සිට 20 වනදා තෙක් වලංගු වන ආකාරයෙන්.
අදාළ නිවේදනයේ දැක්වෙන්නේ අන්තර් නිවර්තන අභිසාරී කලාපය (උතුරු අර්ධ ගෝලයේ සහ දකුණු අර්ධ ගෝලයේ සිට පැමිණෙන සුළං අභිසාරී වන කලාපය) දිවයිනේ කාලගුණයට බලපෑම් කරමින් පවතින බවයි.
එහි බලපෑම හේතුවෙන් දිවයිනේ දැනට පවතින වැසි තත්ත්වයේ වැඩි වීමක් ඉදිරි දිනවලදී බලාපොරොත්තු වනවා.
ඒ අනුව ලබන 17 වනදා සිට 20 වනදා දක්වා දිවයිනේ නිරිතදිග ප්‍රදේශ ඇතුලු බෝහෝ ප්‍රදේශවල විටින් විට වැසි හෝ ගිගුරුම් සහිත වැසි ඇතිවිය හැකියි.
ඇතැම් ප්‍රදේශවල වැඩි ත්‍රිව්‍රරතාවයකින් (කෙටි කාලසීමාවන් තුළ ඇතිවන වැඩි වර්ෂාපතනයන්) යුතු මිලිමීටර් 100ට වැඩි තද වැසි ඇතිවීමේ හැකියාවක් ද පවතිනවා.
තද වැසි පවතින අවස්ථාවලදී කඳුකර ප්‍රදේශවල විශේෂයෙන් නායයාමේ අවදානම් සහිත ප්‍රදේශවල සහ ගංගා ආශ්‍රිතව පහත් බිම්වල ජීවත්වන ජනතාව මේ සම්බන්ධයෙන් විමසිලිමත් වන ලෙසටයි දැනුම් දෙන්නේ.
කඳුකර ප්‍රදේශවල මාර්ග භාවිත කරන්නන් සහ රථ වාහන පදවන්නන් මේ සම්බන්ධයෙන් අවධානය යොමු කරන ලෙසට කාලගුණ විද්‍යා දෙපාර්තමේන්තුව උපදෙස් දී තිබෙනවා.
එමෙන්ම අකුණු සහිත අවස්ථාවල ආරක්ෂිත පියවර අනුගමනය කරන ලෙසට ද ජනතාවට දැනුම් දෙනවා.
අකුණු සහ ගිගුරුම් පවතින අවස්ථාවල එළිමහනේ හෝ ගස් යට නොසිටිය යුතු අතර ආරක්ෂිත ගොඩනැගිල්ලක් හෝ සංවෘත වාහනයක් තුළ රැඳී සිටිය යුතුයි.
කුඹුරු, තේ වතු, ක්‍රීඩා පිටි මෙන්ම ජලාශ වැනි විවෘත ස්ථානවල රැඳී සිටීමෙන් වළකින ලෙසට ද ජනතාවට දැනුම් දෙනවා.
බයිසිකල්, ට්‍රැක්ටර් සහ බෝට්ටු වැනි විවෘත වාහන භාවිතයෙන් ද වැළකිය යුතුයි.
තද සුළං හේතුවෙන් ගස් හා විදුලි රැහැන් බිම ඇද වැටීමට ඉඩ ඇති බැවින් ඒ පිළිබඳව සැලකිලිමත් වන ලෙසට ද ජනතාවට දැනුම් දෙනවා.
හදිසි තත්ත්වයකදී ප්‍රාදේශීය ආපදා කලමනාකරණ නිලධාරීන්ගේ සහාය ලබාගන්නා ලෙසටයි කාලගුණ විද්‍යා දෙපාර්තමේන්තුව ජනතාවට උපදෙස් ලබාදී ඇත්තේ.
මෙම තත්ත්වය සම්බන්ධයෙන් කාලගුණ විද්‍යා දෙපාර්තමේන්තුව විසින් නිකුත් කරනු ලබන නවතම අනාවැකි සහ අනතුරු ඇගවීම් පිළිබඳ අවදානයෙන් පසුවන ලෙසටයි මහජනතාවට දැනුම් දෙන්නේ.
