මෙවර කොළඹ ජාත්යන්තර පොත් ප්රදර්ශනයෙන් පොත් මිල දී ගැනීම සඳහා පැමිණෙන විට මිල දී ගන්නා පොත් රැගෙන යාමට සුදුසු, පරිසර හිතකාමී, නැවත භාවිත කළ හැකි බෑගයක් රැගෙනවිත් පරිසරය සුරැකීමට දායක වන ලෙස මධ්යම පරිසර අධිකාරිය පාරිභෝගිකයින්ගෙන් ඉල්ලා සිටිනවා.
පාරිභෝගියකයින් විශාල පිරිසක් පොත් මිල දී ගන්නා කොළඹ ජාත්යන්තර පොත් ප්රදර්ශනයේ දී පොත් රැගෙන යාම සඳහා ප්ලාස්ටික් බෑග් එනම් විශේෂයෙන් ‘සිලි සිලි මලු’ විශාල වශයෙන් භාවිත කරන බව පසුගිය වසරවල නිරීක්ෂණය වී තිබෙනවා.
පාරිභෝගික කටයුතු පිළිබඳ අධිකාරිය පනතට අනුව නිකුත් කළ අංක 2456/41 දරන 2025 ඔක්තෝබර් මස 01 වැනි දිනැති ගැසට් පත්රය මගින් අතලු සහිත ‘සිලි සිලි මලු’ කිසිදු පාරිභෝගිකයකු වෙත නොමිලේ ලබා දීම නොකළ යුතු බවත් අදාළ බෑග්
විකුණුවහොත් අය කරනු ලබන මුදල බිල්පතේ සඳහන් විය යුතු බවත් ප්රකාශයට පත් කොට තිබෙනවා.
තවද, තනි භාවිත ප්ලාස්ටික් බීම බට සහ කලතන; තනි භාවිත ප්ලාස්ටික් පිඟන්,කෝප්ප, හැඳි, ගෑරුප්පු සහ පිහි; ආදිය ද පොලිතීන් අමුද්රව්යයක් ලෙස යොදා නිෂ්පාදිත ආහාර දවටන (ලන්ච්ෂීට්) ද රට තුළ විකිණීම, විකිණීම සඳහා අර්පණය, නොමිලයේ ලබා දීම, ප්රදර්ශනය හෝ භාවිතය නීතියෙන් තහනම් කර තිබෙනවා.
එබැවින් පොත්ප්රදර්ශනය පවතින පරිශ්රයේ ආහාර විකුණුම් ස්ථානයන් හි මේවා කිසිදු අයුරකින් භාවිත නොකිරීමට වග බලා ගැනීමට ද අදාළ පාර්ශව සමඟ සාකච්ඡා කොට එකඟතාවකට පැමිණ ඇති බවයි මධ්යම පරිසර අධිකාරිය දැනුම් දෙන්නේ.
පොත් ප්රදර්ශනය ආරම්භ කරන 2026 සැප්තැම්බර් මස 25 වන දිනයේ දී මේ සියලු කරුණු පිළිබඳව පොත් අලෙවි කුටි සහ ආහාර විකුණුම් ස්ථාන භාර වෙළෙඳුන්මෙන් ම පාරිභෝගික ජනතාව ද දැනුම්වත් කිරීම සඳහා විශේෂ දැනුම්වත් කිරීමේ වැඩසටහනක් ක්රියාත්මක කිරීමටත් පොත් ප්රකාශකයන්ගේ සංගමය හා එක්ව මධ්යම පරිසර අධිකාරිය කටයුතු යොදා තිබෙනවා.
ඒ අනුව, පොලිතීන් සහ ප්ලාස්ටික් වලින් පරිසරයට සිදුවන හානිය වළක්වාගත හැකි අයුරින් පරිසර හිතකාමී ලෙස පොත් ප්රදර්ශනය පැවැත්වීම සඳහා “නුවණින් කියවමු, නුවණින් රැගෙන යමු” (Read Smart,Carry Smart) යන තේමාව ඔස්සේ මෙම වැඩසටහන ක්රියාත්මක කරනවා.
