ජපාන විදේශ කටයුතු අමාත්‍ය යොෂිමාසා හයාෂි (Yoshimasa Hayashi) මහතාගේ ප්‍රධානත්වයෙන් යුත් ඉහළ පෙළේ නියෝජිත පිරිසක් ලබන සතියේ ශ්‍රී ලංකාවට පැමිණීමට නියමිතව තිබෙනවා.
25 දෙනෙකුගෙන් යුත් මෙම දූත පිරිස සිකුරාදා ශ්‍රී ලංකාවට පැමිණෙනු ඇති බවයි වාර්තා වන්නේ.
ජපාන විදේශ අමාත්‍ය Yoshimasa Hayashi මහතා ජනාධිපති රනිල් වික්‍රමසිංහ මහතා සහ රජයේ ජ්‍යෙෂ්ඨ නායකයින් කිහිප දෙනෙකු හමුවීමට නියමිත බව ජනාධිපති කාර්යාලය සඳහන් කළා.
ජනාධිපති රනිල් වික්‍රමසිංහ මහතා පසුගිය මැයි මාසයේ සිදු කළ ජපාන සංචාරයේදී සාකච්ඡා කරන ලද ණය ප්‍රතිව්‍යුහගත කිරීමේ ක්‍රියාවලිය සහ සංවර්ධන ව්‍යාපෘති පිළිබඳව ද නියෝජිත පිරිස සාකච්ඡා කරනු ඇති.
2019 වසරෙන් පසු ජපාන නියෝජිත පිරිසක් සමග අමාත්‍යවරයෙකු ශ්‍රී ලංකාවට පැමිණෙන පළමු අවස්ථාව ද මෙයයි.
ජපාන විදේශ අමාත්‍යවරයා ලබන 28 සහ 29 යන දෙදින තුළ දූත පිරිසක් සමඟ සිදු කරනු ලබන සංචාරය, පසුගිය වසරේ සිට දකුණු ආසියානු කලාපයෙන් පිටත රටක සිට සිදුකරන පළමු ඉහළ මට්ටමේ සංචාරයයි.
ශ්‍රී ලංකාව සහ ජපානය අතර සබඳතාවල විෂය පථය වැඩිදියුණු කිරීමට මෙමගින් අපේක්ෂා කෙරෙන අතර පැමිණෙන නියෝජිත පිරිස ජනාධිපතිවරයා, අග්‍රාමාත්‍යවරයා සහ විදේශ අමාත්‍යවරයා සමඟ සාකච්ඡා කිරීමට නියමිතව තිබෙනවා.
