කොරෝනා වසංගතය ඇතුළු ගෝලීය අර්බුද හමුවේ දියුණු වෙමින් පවතින රටවලට දැඩි බලපෑමක් එල්ල වී ඇති බව ජනාධිපති ගෝඨාභය රාජපක්ෂ මහතා පවසනවා.
බෙංගාල බොක්ක ආශ්‍රිත රටවල බහු අංශික තාක්ෂණික සහ ආර්ථික සහයෝගීතාව සඳහාවන එකමුතුව හෙවත් බිම්ස්ටෙක් සමුළුවේ පස්වන රාජ්‍ය නායක සමුළුව අමතමින් ජනාධිපතිවරයා මේ බව සඳහන් කළා.
ජනාධිපතිවරයා ඇතුළු බිම්ස්ටෙක් රටවල රාජ්‍ය නායකයින් අද (30) සමුළුව ඇමතුවේ වීඩියෝ තාක්ෂණය ඔස්සේයි.
“බහු ආංශික තාක්ෂණික සහ ආර්ථික සහයෝගීතාව සඳහා වන බෙංගාලබොක්ක ආශ්‍රිත රටවල සමුළුව” හෙවත් පස්වන බිම්ස්ටෙක් සමුළුව පසුගිය 28 වනදා ආරම්භ වුණා.
මෙවර සමුළුව පැවැත්වුණේ කොළඹ BMICH පරිශ්‍රයේදීයි.
එහිදී ජනාධිපතිවරයා දැක්වූ අදහස් …
” කොවිඩ් 19 වසංගතය ලොව සියලු ජාතීන්ට දැඩි බලපෑමක් එල්ල කළා. කොවිඩ් වසංගතය ඇතුළු ගෝලීය අර්බුදය හමුවේ අද දියුණු වෙමින් පවතින රටවල් දුගී භාවයට ඇද දමා තිබෙනවා.
මෙරට ආර්ථිකයට මෙන්ම සංචාරක කර්මාන්තය ඇතුළු සියලු ක්ෂේත්‍රයන්ට වසංගතය හමුවේ දැඩි බලපෑමක් එල්ල වුණා.
ඒ වගේම බෙංගාල බොක්ක ආශ්‍රිත රටවල් කලාපිය ත්‍රස්තවාදය, අන්තවාදය, සහ මත්ද්‍රව්‍ය ජාවාරම්වලින් ආරක්ෂා කර ගත යුතුයි.
ඒ සඳහා දිගු කාලීන ක්‍රියාමාර්ග ගත යුතුයි.
ඒ වගේම කලාපය ආපදා තත්ත්වයන්ගෙන් ආරක්ෂා කර ගැනීම සඳහාද දිගු කාලීන සැලසුම් අවශ්‍යයි .
මේ කලාපයට ලොව ආර්ථික වර්ධනයේ යාන්ත්‍රණය හිමියි. ඒ නිසා නිසි සංවර්ධනයක් කරා රැගෙන යාම අප සියලු දෙනාගේම අපේක්ෂාව වියයුතුයි.
ඒ වගේම එක්සත් ජාතීන්ගේ ප්‍රතිපත්තීන්ට අනුකූලව රටේ ජාතික ප්‍රතිපත්තීන් ඉදිරියට ගෙන යන්න කටයුතු කරනවා.
2030 වසර වන විට රටේ බලශක්ති අවශ්‍යතාවයන් 70% ක් සපුරාලීම අපේ අපේක්ෂාවයි.
මේ මොහොතේ රට අභියෝග රැසකට මුහුණ දී තිබෙනවා. ඒවා ගොඩනැගීමට සාමූහිකව ක්‍රියා කරනවා “
