කොල්ලුපිටිය ප්‍රදේශයේ රූපලාවන්‍යාගාරයක්, නිවාස දෙකක් ඇතුළු තවත් ස්ථාන දෙකක් බිඳ රුපියල් ලක්ෂ 40ක පමණ දේපළ සොරා ගත් “ග්‍රෑන්ඩ්පාස් ඩුබායි” නැමැත්තා අත්අඩංගුවට ගත් බව කොල්ලුපිටිය පොලිසිය පවසනවා.
සැකකරු සොරා ගෙන ඇති රූපලාවන්‍ය උපකරණ, ආලේපන වර්ග, රන් භාණ්ඩ, අයි පෑඩ්, අයි ෆෝන් ඇතුළු උපකරණ රැසක් පොලිසිය සොයාගෙන ඇති බවයි අප වාර්තාකරු කියාසිටියේ.
පසුගිය පෙබරවාරි 25 වනදා කොල්ලුපිටිය පාසල් පටුමගේ රූපලාවණ්‍යාගාරයක් බිඳ රූපලාවන්‍ය කටයුතු සඳහා යොදා ගන්නා රුපියල් ලක්ෂ 14කට ආසන්න වටිනාකමින් යුත් විවිධ උපකරණ සහ ආලේපන වර්ග සොරා ගැනීම මෙන්ම 7 වනදා කැමරල් පෙදෙස වලව්වක පිටුපස දොර කඩා ඇතුළු වී පවුම් දහයකට ආසන්න රන් භාණ්ඩ සහ මුදල් සොරා ගැනීම මෙන්ම අයි පෑඩ්, අයි ෆෝන් සොරා ගැනීම සම්බන්ධයෙන් CCTV දර්ශන අනුව සිදුකළ විමර්ශනවලදී සැකකරු හඳුනාගෙන අත්අඩංගුවට ගෙන තිබෙනවා.
අත්අඩංගුවට ගත් මෙම සැකකරුගෙන් සිදු කළ දීර්ඝ ප්‍රශ්න කිරීමේ දී ලිබර්ටි ප්ලාසා සුපිරි වෙළඳ සංකීර්ණය ඉදිරිපිට තිබෙන රූපලාවණ්‍යාගාරයක්, චීන ජාතිකයන් පදිංචි නිවසක් මෙන්ම පෞද්ගලික ආයතනයක් බිඳ දේපළ සහ මුදල් සොරාගත් බවට ද හෙළිකර ඇතැයි සඳහන්.
සැකකරු සොරාගත් දේපළ මාළිගාවත්ත අලුත් පාර, දෙමටගොඩ සහ ග්‍රෑන්ඩ්පාස් ප්‍රදේශවලට අඩු මුදලට අලෙවි කර තිබියදී සොයාගෙන ඇත්තේ සැකකරු අනාවරණය කළ කළ තොරතුරු අනුවයි.
මෙම පුද්ගලයා මෙලෙස සොරාගත් දේපළ අලෙවි කර මත්ද්‍රව්‍ය භාවිතයට මෙන්ම මුදල් ඔට්ටුවට සූදු ක්‍රීඩාවේ නිරත වී ඇතැයි ද හෙළිවී තිබෙනවා.
