මරදාන සිට බෙලිඅත්ත බලා ධාවනය වූ දුම්රියක තුන්වන පන්තියේ මැදිරියක ආසනයක් යට තිබී බෑගයක දමා තිබූ ටී56 උණ්ඩ 57ක් අද (29) දහවල් සොයාගෙන තිබෙනවා.
දසත ප්‍රාදේශීය වාර්තාකරු පැවසුවේ; මරදාන දුම්රිය ස්ථානයෙන් පෙරවරු 6.30ට ගමන් ඇරඹි දුම්රිය පස්වරු 12.15ට පමණ බෙලිඅත්ත දුම්රිය ස්ථානයට ළඟා වූ බවයි.
බෙලිඅත්ත දුම්රිය ස්ථානයේ දුම්රිය ආරක්ෂක අංශයේ නිලධාරියෙකු සුපුරුදු පරිදි මැදිරියෙන් මැදිරියට ගොස් පරීක්ෂා කර ඇති අතර තුන්වන පන්තියේ 798 මැදිරියේ සිටි දෙදෙනකු දුම්රියෙන් බැස ගොස් තිබෙනවා.
ඉන් පසුව ආරක්ෂක නිලධාරියා ඔවුන් සිටි ආසනය අසලට ගොස් ඇති බවත් එම ආසනය යට තිබී කළු පැහැති බැක්පැක් වර්ගයේ බෑගයක් හමු ව ඇති බවත් වාර්තාවනවා.
බෑගය පරීක්ෂා කිරීමේ දී එය තුළ තිබී ටී56 උණ්ඩ පිරවූ මැගසිනයක් ඇතුළුව උණ්ඩ 57ක් හමුව තිබෙනවා.
බෑගය දමා ගිය පුද්ගලයන් සොයා ගැනීමට දුම්රිය ආරක්ෂක අංශ නිලධාරින් උත්සාහ කළ ද එය ව්‍යාර්ථ වුණා.
මෙම දුම්රිය පස්වරු 12.40 ට මහනුවර බලා පිටත් වීමට නියමිතව තිබුණ ද එය නියමිත වේලාවට ගමන් ආරම්භ කිරීමට නොහැකි වූයේ මෙවන් කලබලකාරී පසුබිමක් මතයි.
මහනුවර බලා යාමට දුම්රියට ගොඩ වී සිටි සියලු මගීන් දුම්රියෙන් බස්වා පොලිස් විශේෂ කාර්ය බළකායේ තංගල්ල කඳවුරේ නිලධාරින් විසින් දුම්රිය පරීක්ෂා කෙරුණා.
තංගල්ල මූලස්ථාන පොලිසියේ පොලිස් නිල සුනඛයෙකු ගෙන්වා ද දුම්රිය පරීක්ෂාවට ලක් කෙරුණු බවයි වාර්තා වන්නේ.
තංගල්ල කොට්ඨාස අපරාධ විමර්ශන ඒකකයේ නිලධාරින් සහ බෙලිඅත්ත පොලිසිය සිද්ධිය සම්බන්ධයෙන් විමර්ශනයක් ආරම්භ කර තිබෙනවා.
