පෙරේදා (03) රාත්‍රියේ දී අහමදාබාද් නුවර දී රෝයල් චැලෙන්ජර්ස් බැංග්ලූරු කණ්ඩායම වසර 18කට පසුව කුළුඳුල් IPL ශූරතාව ජයග්‍රහණය කිරීම වෙනුවෙන් එය බැංග්ලූරු ප්‍රාන්තයේ සැමරීමට කටයුතු කෙරුණු අතර, සිය ක්‍රීඩා වීරයින් දැක බලා ගැනීමට පැමිණ සිටි දැවැන්ත ජනකාය දැඩි තෙරපීමකට ලක් ව 11 දෙනෙකු මියගොස්, තවත් විශාල පිරිසක් බරතපළ තුවාල ලබා රෝහල් ගත කෙරුණා.
ඉන්දීය මාධ්‍ය වාර්තා කරන්නේ, මෙම ඛේදනීය සිදුවීම සිදු ව තිබියදීත් RCB කණ්ඩායම කිසිදු සංවේදීත්වයකින් තොරව චින්නස්වාමි ක්‍රීඩාංගණය තුළ ජය සැමරුම් පැවැත්වූ බවයි.
එය නුසුදුසු ක්‍රියාවක් බවත්, බැංග්ලූරු ප්‍රාන්ත කළමනාකාරීත්වය නිසි පරිදි ක්‍රියාත්මක නොවීම මත මෙවන් ඛේදවාචකයක් ඇති වූ බවත් හිටපු ඉන්දීය ක්‍රිකට් ක්‍රීඩක මදන් ලාල් චෝදනා කරන්නේ.
එබැවින් ප්‍රාන්ත රජයට මෙන් ම RCB කණ්ඩායමට එරෙහිව ද නඩු පවරා රුපියල් කෝටි 100ක වන්දි මුදල් ඉල්ලා සිටීම සුදුසු බව ද මදන් ලාල් අවධාරණය කරනවා.
මෙම සිදුවීම සම්බන්ධයෙන් BCCI කිසිදු වගකීමක් රහිතව සිටින බවත්, බරපතළ තුවාල ලැබූවන් මේ වනවිටත් බෝරිං හා වයිදේහි රෝහල් වෙත යොමු කර ඇති බවත් ඇතැමුන් දැඩි සත්කාර ඒකකවල ප්‍රතිකාර ලබන බවත් වාර්තා වනවා.
තම ක්‍රීඩා වීරයින් දැක බලා ගැනීමට ආසාවෙන් නොසිතූ ජනගඟක් චින්නස්වාමි ක්‍රීඩාංගණයට පිටත රැස්ව සිටි අතර තත්ත්වය පාලනය කරගැනීමට නොහැකිව පොලිසිය ලති ප්‍රහාරයක් ද එල්ල කළා.
මින් පැමිණ සිටි ජනගඟ අතර කලබලකාරී තත්ත්වයක් හටගත් බවයි වාර්තා වන්නේ.
එහි ප්‍රතිඵලයක් ලෙස ප්‍රේක්ෂකයින් 11ක් ජීවිතක්ෂයට පත් වුණා.
සිද්ධියෙන් පසු ඊයේ මාධ්‍ය අමතමින් කර්ණාටක මහ ඇමති සිද්ධරාමයියා පැවසුවේ, මියගිය අයගේ පවුල් වෙත රුපියල් ලක්ෂ 10ක වන්දියක් පිරිනැමෙන බවයි.
මූලාශ්‍රය – NDTV
