මාලඹේ හල්බරාව ප්රදේශයේ වැඩබිමකදී කුඩා දරුවෙකු ජිවිතක්ෂයට පත්වීමේ සිද්ධියට අදාළව අත්අඩංගුවට ගත් සැකකරු ලබන 15 වනදා දක්වා රක්ෂිත බන්ධනාගාර ගත කර තිබෙනවා.
සැකකරු අද අලුත්කඩේ අංක 06 මහේස්ත්රාත් අධිකරණයට ඉදිරිපත් කිරීමෙන් අනතුරුවයි මෙම නියෝගය ලබා දී ඇත්තේ.
මෙම මරණයට අදාළව අත්අඩංගුවට ගැනුණු සැකකරු කොට්ටාව ප්රදේශයේ පදිංචි 51 හැවිරිදි අයෙක්.
ඔහු අදාළ දරුවා රැඳී සිටි වැඩබිමේ තණකොළ කපන්නෙකු ලෙස සේවය කළ පුද්ගලයෙක් වන අතර සැකකරු ඊයේ මුල්ලේරියාව පොලිසිය මගින් අත්අඩංගුවට ගෙන තිබුණා.
තමා තණකොල කපමින් සිටියදී අත්වැරදීමකින් තණකොළ කපන යන්ත්රයේ තලය දරුවාගේ උදරයේ වැදී ඇද වැටුණු බවයි සැකකරු පොලිසිය හමුවේ ප්රකාශකර ඇත්තේ.
ඒ සම්බන්ධයෙන් ඇති වූ බියක් හේතුවෙන් අසල තිබූ බෝතලයක් බිඳ දමා අනතුර එමගින් සිදු වූ බවට පෙන්වීමට උත්සාහ කළ බව සැකකරු ප්රකාශකර තිබෙනවා.
පෙරේදා (08) සවස මුල්ලේරියාව පොලිසියට ලැබුණු තොරතුරකට අනුව හල්බරාව ප්රදේශයේ වැඩබිමක් ඉදිරිපිට දී මෙම මළ සිරුර සොයා ගැනුණා.
මෙලෙස ජිවිතක්ෂයට පත්වුණේ හල්බරාව ප්රදේශයේ පදිංචි අවුරුදු 5යි මාස 6ක් වයසැති දරුවෙක්.
ඒ අසළ දරුවාගේ එක් සෙරෙප්පුවක් දක්නට ලැබුණු අතර අනෙක් සෙරෙප්පුව දරුවාගේ පාදයේ රැඳී තිබූ බව සඳහන්.
මියගිය දරුවාගේ පියා වෙන්ව ජීවත් වන අතර මව දිවා කාලයේ රැකියාව සඳහා පිටත්ව යන හෙයින් දරුවා රැක බලා ගනු ලැබ ඇත්තේ ඔහුගේ මිත්තනිය සහ සීයා විසිනුයි.
දරුවා මිය යාමට පැයකට පමණ පෙර ප්රදේශයේම පදිංචි තවත් කාන්තාවක් දරුවා එම වැඩබිම ආසන්නයේ ගැවසෙන ආකාරය දැක තිබූ අතර ඇය පවසන්නේ එම අවස්ථාවේ තවත් පුද්ගලයෙක් ඒ අසළ තණකොළ කපමින් සිටි බවයි.
මේ සම්බන්ධයෙන් අදාළ කාන්තාව පැවසුවේ මෙවැන්නක්,
“මම වැඩ ඇරිලා එනකොට මේ පුතා වත්තේ මැදක් හරියේ හිටියා. 5ට 5ක් විතර වගේ මගේ හිතේ එතැනින් එන්න ඇත්තේ. ඒ වෙලාවේ තමයි එතන හිටියේ. මම ඊට පස්සේ කිව්වා පුතේ ඔතන සත්තු එහෙම ඉන්න හින්දා ඔතන ඉන්න එපා පුතේ උඩහට යන්න කියලා. එහෙම මම කියාගෙන බායි කියලා කියාගෙන ආවා.”
පොලිසිය පවසන්නේ දරුවාගේ මළ සිරුර තිබූ ස්ථානයට අඩි දෙකකට පමණ දුරකින් ලේ පැල්ලම් ද සහිතව කැඩුණු වීදුරු බෝතලයක් දක්නට ලැබුණු බවයි.
මුල්ලේරියාව හදිසි මරණ පරීක්ෂක චන්න පෙරේරා මහතා අද (09) උදෑසන එම ස්ථානයට පැමිණ ස්ථානීය පරීක්ෂණය සිදු කරනු ලැබු අතර පශ්චාත් මරණ පරීක්ෂණය සඳහා මෘත ශරීරය මුල්ලේරියාව බෝවන රෝග විද්යායතනය වෙත යොමුකරනු ලැබුවා.
එහිදී හෙළිවී ඇත්තේ තියුණු තලයකින් උදරයට සිදු වූ තුවාල හමුවේ ලේ වහනය වීමෙන් මෙම දරුවා මියගොස් ඇති බවටයි.
එමෙන්ම මෙම දරුවා ලිංගික අතවරයකට ලක්ව නොමැති බවට ද හෙළිවී තිබෙනවා.
