කටුනායක නිදහස් වෙළෙඳ කළාපයේ පිහිටි බ්‍රැන්ඩික්ස් ඇඟලුම් කර්මාන්තශාලාවේ නිෂ්පාදිත රුපියල් ලක්ෂ දෙකකට අධික වටිනාකමකින් යුතු කාන්තා සහ පිරිමි යට ඇඳුම් තොගයක් සොරා ගෙන ගොස් රෙදිපිළි අලෙවිසැල්වලට විකුණූ එම කර්මාන්තශාලාවේ සේවකයෙකු කටුනායක පොලිසිය විසින් අද පස්වරුවේ අත් අඩංගුවට ගෙන තිබෙනවා.
මොහු මෙම ඇඟලුම් කර්මාන්තශාලාවේ වසර 15ක් පමණ සේවය කර ඇති කිඹුලාපිටිය ගල්මංකඩ ප්‍රදේශයේ පදිංචි 43 හැවිරිදි දෙදරු පියෙක්.
සැකකරු මෙම කර්මාන්ත ශාලාව තුළ යට ඇඳුම් නිෂ්පාදනය කෙරෙන විවිධ අංශ වෙත ගොස් ඒවා මුලින්ම තම කළිසම් සාක්කුවල දමා සඟවා ගෙන පසුව වැසිකිළිය තුළට ගොස් ඇඟලා ගෙන ඒවා සිය නිවෙසට ගෙන ගොස් තිබෙනවා.
අනතුරුව එම ඇඳුම් සැකකරු කොළඹ ඇතුළු නාගරික ප්‍රදේශවල පිහිටි වෙළෙඳ සැල් වෙත අලෙවි කර ඇතැයි සඳහන්.
අපනයනය සදහා සූදානම් කර ඇති බොහෝ යට ඇඳුම් වර්ග තවමත් එම රටවලට හදුන්වා දී නොතිබුණු වර්ගවල ඒවා වන බවටයි හෙළිවී ඇත්තේ. කර්මාන්තශාලාව තුළ මේ ආකාරයට අතුරුදන් වී ඇති ඇඟලුම් ප්‍රමාණය පිළිබඳව සොයා බැලීම සදහා මේ වනවිට අභ්‍යන්තර විගණනයක් ද ආරම්භ කර තිබෙනවා.
කටුනායක පොලිසිය සිද්ධිය සම්බන්ධයෙන් වැඩිදුර විමර්ශන සිදු කරනවා.
