උතුරු දෙසින්, කච්චතිව් දූපතේ සිට නාවික සැතපුම් 08ක් පමණ කිලෝමීටර් 14ක් පමණ දුරින් වූ ඉන්දීය මුහුදු කලාපයේ දී අනතුරට ලක් වූ ඉන්දීය ධීවර යාත්රාවක සිටි ධීවරයින් දෙදෙනෙකු නිරුපද්රිතව බේරා ගැනීමට අද දින (27) නාවික හමුදාව විසින් කටයුතු කරනු ලැබුවා.
කච්චතිව් දූපතේ ශ්රී ලංකා නාවික හමුදා අනුඛණ්ඩය වෙතින් එම දූපතේ වෙරළ තීරයේ අද උදෑසන සිදුකළ පාමුර සංචාරයක දී එම වෙරළ තීරයට පිහිනා ආ පුද්ගලයෙකු නිරීක්ෂණය වී ඇති බවයි නාවික හමුදා මාධ්ය අංශය නිවේදනය කළේ.
එම පුද්ගලයාගෙන් සිදුකළ විමසීමේ දී, ඔහු ඉන්දීය ජාතික ධීවරයෙකු බවට අනාවරණය වූ අතර, ධීවර කටයුතු සිදු කරමින් සිටියදී මුහුදේ රළු ස්වභාවය හේතුවෙන් ධීවරයන් සිව්දෙනෙකු රැගත් ඔවුන් පැමිණි ධීවර යාත්රාව මුහුදේ පෙරළී ආපදාවට පත් වීමෙන් කච්චතිව් දූපත දෙසට පිහිනා ආ බවට හෙතෙම ප්රකාශ කර තිබෙනවා.
ඒ අනුව, නාවික හමුදාව විසින් කච්චතිව් දූපතට ඔබ්බෙන් වූ මෙරට මුහුදු ප්රදේශයේ නාවික හමුදා යාත්රා යොදවා ආපදාවට පත් ඉන්දීය ධීවර යාත්රාවේ සිටි ධිවරයින් මුදා ගැනීම සඳහා මෙහෙයුමක් ආරම්භ කරන ලද අතර, එහිදී එම මුහුදු ප්රදේශයේ පාවෙමින් සිටි තවත් ධීවරයෙකු මුදාගැනීමට කටයුතු කෙරුණා.
නාවික හමුදාව විසින් මුදා ගත් ඉන්දීය ධීවරයින් දෙදෙනා යහපත් සෞඛ්ය තත්ත්වයෙන් පසුවන අතර, ඔවුන් ඉන්දීය බලධාරීන් වෙත භාරදීමට අවශ්ය කටයුතු සිදු කෙරෙමින් පවතින බව ද තොරතුරු වාර්තා වනවා.
රළු මුහුදු ස්වභාවය හමුවේ වුව ද, අනෙක් ඉන්දීය ධීවරයින් දෙදෙනා සොයා කච්චතිව් දූපතට ඔබ්බෙන් වු මෙරට මුහුදු ප්රදේශයේ නාවික හමුදාව විසින් සෙවීම් සහ මුදා ගැනීමේ මෙහෙයුම අඛණ්ඩව සිදු කරමින් සිටින බවයි නාවික හමුදා මාධ්ය අංශය නිකුත් කළ නිවේදනයේ දැක්වෙන්නේ.
මේ සම්බන්ධයෙන් ඉදිරි කටයුතු සඳහා කොළඹ සමුද්රීය සෙවීම් හා මුදවාගැනීමේ සම්බන්ධීකරණ මධ්යස්ථානය මගින්, ඉන්දියාවේ චෙන්නායි සමුද්රීය සෙවීම් හා මුදා ගැනීමේ සම්බන්ධීකරණ මධ්යස්ථානය දැනුවත් කිරීම ද සිදු කර තිබෙනවා.
