පාකිස්ථාන හිටපු අග්‍රාමාත්‍ය ඉම්රාන් ඛාන්ගේ පක්ෂයේ ධජය නිවසේ එස වූ පුත්‍රයාව පියා විසින් ඝාතනය කළ පුවතක් පෙෂාවර් නගරයට ආසන්නයෙන් වාර්තා වනවා.
කටාර්හි සේවය කර ආපසු නිවසට පැමිණි පුතා, ඉම්රාන් ඛාන්ගේ පකිස්ථාන් ටෙහ්රීක්-ඊ-ඉන්සාෆ් පක්ෂයේ ධජය නිවසේ එසවීමත් සමඟ එය වහාම ඉවත්කරන ලෙස පියා විසින් ඔහුට දන්වා ඇති බව සඳහන්.
පුත්‍රයා විසින් එය ප්‍රතික්ෂේප කිරීමත් සමඟ දෙදෙනා අතර බහින් බස්වීමක් සිදුව ඇති අතර, එහිදී පියා විසින් පුත්‍රයාට පිස්තෝලයකින් වෙඩි තබා තිබෙනවා.
වෙඩි වැදීමෙන් බරපතළ තුවාල ලැබූ 31 හැවිරිදි පුත්‍රයා රෝහල් ගතකරන විට මියගොස් ඇති බවයි විදෙස් මාධ්‍ය වත කළේ.
වෙඩි තැබීම සිදුකළ සැකකාර පියා පළාගොස් ඇති අතර පහු සොයා විමර්ශන ආරම්භ කර තිබෙනවා.
එළඹෙන පෙබරවාරි 08 වනදා පැවැත්වීමට නියමිත පාකිස්ථාන මැතිවරණ බොහෝ විට පකිස්ථානයේ ප්‍රචණ්ඩත්වයෙන් උතුරා යන මැතිවරණයක් වනු ඇති බවයි බොහෝ දෙනෙක් පුරෝකථනය කර ඇත්තේ.
