ආබාධ සහිත මෙන්ම විශේෂ අවශ්‍යතා සහිත පුද්ගලයින්ට ප්‍රමුඛතාවය ලබාදෙමින් පත්ල පහත් බස් රථ සේවාව අද (21) මාකුඹුර බහුවිධ ප්‍රවාහන මධස්ථානයෙන් ආරම්භ වුණා.
ඒ ප්‍රවාහන, මහාමාර්ග සහ නාගරික සංවර්ධන අමාත්‍ය බිමල් රත්නායකගේ ප්‍රධානත්වයෙන්.
මාකුඹුර සිට කොළඹ කොටුව දක්වාත්, මාකුඹුර සිට කඩවත දක්වාත් මාර්ගයන් හි නියමු ව්‍යාපෘතියක් ලෙස මෙය ක්‍රියාත්මක කෙරෙන අතර, විශේෂයෙන් කොළඹ ජාතික රෝහල සහ මහරගම අපේක්ෂා රෝහල ඇතුළු ප්‍රධාන සෞඛ්‍ය සේවා මධ්‍යස්ථාන මෙම මාර්ග මගින් ආවරණය කෙරෙනවා.
රෝද පුටු භාවිත කරන මගීන්ට සහ දෘෂ්‍යාබාධිත මගීන්ට සේම ගැබිණි මව්වරුන්ට ද ඉතා පහසුවෙන් බස් රථයට ගොඩවිය හැකි ලෙස විශේෂයෙන් නිර්මාණය කර ඇති මෙම පත්ල පහත් විශේෂ බස් රථ 10ක් අද (21) දිනයේ මෙලෙස මගී ප්‍රවාහනය වෙනුවෙන් යොදවනු ලැබුවා.
මෙම එක් බස් රථයක මගී ආසන 30 කින් සමන්විත වන අතර, මෙම බස් රථ සඳහා රෝද පුටුවලින් ගොඩවන මගීන්ට වෙනමම ආසන වෙන් කර තිබෙනවා.
