ආනයනික කිරිපිටි සඳහා පවතින බද්ද 10% කින් වැඩි කිරීමක් සිදුකළ ද, කිරිපිටි මිලේ වැඩි කිරීමක් සිදුනොකරන බව කිරිපිටි ආනයනකරුවන්ගේ සංගමය පවසනවා.
එම සංගමයේ සාමාජික ලක්ෂ්මන් වීරසූරිය මාධ්‍ය වෙත අදහස් දක්වමින් සඳහන් කළේ කිරිපිටි ආනයනය කිරීමේ දී අධික බදු මුදලක් රජයට ගෙවීමට සිදුව ඇති බවයි.
එම බදු මුදල් අඩු කරන්නේ නම් කිරිපිටි ග්‍රෑම් 400 පැකට්ටුවක් රුපියල් 620.00ක් වැනි මුදලකට පාරිභෝගිකයාට ලබාදීමට හැකියාව පවතින බවයි ඔහු වැඩිදුරටත් සඳහන් කළේ.
මාස තුනකට අවශ්‍ය කිරිපිටි මේ වනවිට ආනයනය කර තිබීම හේතුවෙන් ආනයනික බද්ද 10% කින් වැඩි කළ ද මාස තුනක් යනතෙක් කිරිපිටි මිල ඉහළ දැමීමට අවශ්‍යතාවක් නොමැති බවයි ඔහු පැවසුවේ.
ආනයනික කිරිපිටි සඳහා බදු වැඩි කළ ද, දේශීය කිරිපිටි පරිභෝජනයේ වැඩි වීමක්ද සිදුව නොමැති බවත් ඔහු මෙහිදී සඳහන් කර සිටියා.
මේ අතර වැඩිදුරටත් අදහස් දක්වමින් ඔහු පවසා සිටියේ දේශීය කිරි කර්මාන්තය සඳහා රජය අනවශ්‍ය මුදල් වැය කරන අවස්ථාවක ආනයනික කිරිපිටි සඳහා කිසියම් සහනයක් ලබාදෙන්නේ නම් එම සහනය ජනතාවට ලබාදීමේ හැකියාවක් කිරිපිටි ආනයනකරුවන්ට හැකි බවයි.
