වයස අවුරුදු 02ක දැරියක් මුදලට අලෙවි කළ බව කියන සිද්ධියක් සම්බන්ධයෙන් දැරියගේ මව, දැරියව මිල දී ගත් කාන්තාව සහ තවත් පිරිමි පුද්ගලයෙක් කිලිනොච්චිය, ධර්මපුරම් පොලිසි විසින් පෙරේදා (25) දිනයේ අත්අඩංගුවට ගෙන තිබෙනවා.
දැරියගේ මව සහ පිරිමි පුද්ගලයා විසින් රුපියල් 50,000ක මුදලකට දැරියව විකිණීමට කතා කරගෙන ඇති අතර, කෙසේ වෙතත් රුපියල් 40,000ක මුදලකට දැරියව විකුණා ඇති බවයි පොලිසිය සඳහන් කළේ.
සිද්ධිය පිළිබඳව පොලිසිය ලැබුණු තොරතුරක් මත සැකකාරියන් දෙදෙනා සහ සැකකරු අත්අඩංගුවට ගැනීමට මෙලෙස කටයුතු කර තිබෙනවා.
පොලිසිය කළ ප්රශ්න කිරීම්වල දී දැරිය රුපියල් 40,000ක මුදලකට අලෙවිකර ලබාගත් මුදල්වලින් දැරියගේ මව සහ පිරිමි පුද්ගලයා විසින් රුපියල් 15,000ක් වටිනා පාවිච්චි කළ ජංගම දුරකථනයක් මිල දී ගෙන ඇති අතර, තවත් රුපියල් 10,000ක පමණ මුදලක් වැයකර විවිධ භාණ්ඩ මිල දී ගත් බවයි පවසා ඇත්තේ.
අත්අඩංගුවට ගැනුණු සැකකාර මව 27 හැවිරිදි වියේ පසුවන අතර ඇයට වයස අවුරුදු 04ක තවත් දැරියක් ද සිටිනවා.
අත්අඩංගුවට ගැනුණු සැකකාර පුද්ගලයා දැරියගේ මවගේ අනියම් පුරුෂයා වන අතර ඔහු 31 හැවිරිදි වියේ පසුවන අයෙක් බවයි පොලිසිය සඳහන් කළේ.
එමෙන්ම අත්අඩංගුවට පත්වූවන් අතර සිටින දැරිය මිල දී ගත් කාන්තාව 36 හැවිරිදි වියේ පසුවන තැනැත්තියක් බවයි වාර්තා වුණේ.
අත්අඩංගුවට ගැනුණු සැකකාරියන් දෙදෙනා සහ සැකකරු ලබන 29 වනදා දක්වා රක්ෂිත බන්ධනාගාර ගත කිරීමට නියෝග කර ඇත්තේ, ඔවුන්ව ඊයේ (26) කිලිනොච්චිය අධිකරණය වෙත ඉදිරිපත් කිරීමෙන් අනතුරුවයි.
