අනපේක්ෂිත පුවත අසා සංවේදී වූ මොහොමඩ් නබීගෙන් දුනිත්ට පණිවුඩයක්

ආසියානු කුසලාන ක්‍රිකට් තරගාවලියේ දී අවසන් පූර්ව වටයට පිවිසීමට ශ්‍රී ලංකා කණ්ඩායමට ඊයේ (19) හැකියාව ලැබුණා.

ඒ, මෙම තරගයේ දී ශ්‍රී ලංකා පිළේ ප්‍රතිවාදීන් වූ ඇෆ්ගනිස්ථානය කඩුලු 06කින් පරාජය කරමින්.

කෙසේ වෙතත් මෙම ජයග්‍රහණයේ සතුට සමරන්නට ශ්‍රී ලංකා ක්‍රීඩකයින්ට ඊයේ (19) රාත්‍රියේ අවස්ථාව හිමිවුයේ නැහැ.

ඒ, මෙම තරගය අතර තුර වාර්තා වූ ශ්‍රී ලංකා ක්‍රීඩක දුනිත් වෙල්ලාලගේගේ පියාගේ අභාවය පිළිබඳව අවාසනාවන්ත පුවත හේතුවෙන්.

දුනිත් පියා ඊයේ තරගය නරඹමින් සිටිය දී හදිසියේ ඇති වූ හෘදයබාධයක් හේතුවෙන් අභාවප්‍රාප්ත වී ඇති බවයි තොරතුරු වාර්තා වුණේ.

මෙම තරගයේ ඇෆ්ගනිස්ථාන ඉනිමේ අවසන් පන්දුවාරය යැවීමේ අවස්ථාව ශ්‍රී ලංකා නායක චරිත් අසලංක විසින් දුනිත්ට ලබාදෙන අතර, එතෙක් හොඳින් පන්දු යවා සිටි දුනිත් එම පන්දුවාරයේ දී දැඩි ප්‍රහාරයකට ලක් වනවා.

එම පන්දුවාරයේ දී ඇෆ්ගනිස්ථාන තුන් ඉරියව් ක්‍රීඩක මොහොමඩ් නබී විසින් ලකුණු 32ක් උදුරා ගනු ලබනවා.

තරගයෙන් අනතුරුව ශ්‍රී ලංකා ක්‍රිකට් කණ්ඩායමේ කළමණාකරු විසින් දුනිත් වෙල්ලාලගේට සිය පියාගේ අභාවය පිළිබඳව දැනුම්දෙන අවස්ථාව දැක්වෙන වීඩියෝවක් සමාජ මාධ්‍යයේ සංසරණය වනවා.

මේ අතර තරගයෙන් පසු ක්‍රීඩාංගණයෙන් පිටව යන්නට සූදානම් වූ ඇෆ්ගනිස්ථාන ක්‍රීඩක මොහොමඩ් නබීට දුනිත්ගේ පියාගේ අභාවය පිළිබඳව ද කිසියම් අයෙකු විසින් දැනුම්දෙන අයුරු දැක්වෙන වීඩියෝවක් සමාජ මාධ්‍යයේ මේ වනවිට සංසරණය වන ආකාරය දැකගත හැකියි.

එහිදී එම පුවත අසන මොහොමඩ් නබී එක්වරම විමතියට පත්වන ආකාරය එහි දැක්වෙනවා.

මේ අතර අදාළ පුවත පිළිබඳව සංවේදී වූ නබී විසින් සිය එක්ස් ගිණුමේ විශේෂ සටහනක් පළකර තිබෙනවා.

එහි ඔහු සඳහන් කර ඇත්තේ ආදරණීය පියාගේ වියෝව ගැන දුනිත් වෙල්ලාලගේ සහ ඔහුගේ පවුලේ අයට තම හෘදයාංගම ශෝකය පළ කරන බවයි.

එමෙන්ම සෑම විටම ශක්තිමත්ව සිටින ලෙසත් දුනිත්ට ඔහු එම එක්ස් සටහනේ දක්වා තිබෙනවා.