පහළ වායුගෝලයේ පවතින කැළඹිලි ස්වභාවය හේතුවෙන් අද (15) දිනයේත් බස්නාහිර, සබරගමුව, මධ්‍යම සහ වයඹ පළාත්වලටත් ගාල්ල සහ මාතර දිස්ත්‍රික්කවලට මිලිමීටර් 100 ඉක්ම වූ තද වැසි ඇතිවිය හැකි බව කාලගුණ විද්‍යා දෙපාර්තමේන්තුව නිවේදනය කරනවා.
දිවයිනේ සෙසු ප්‍රදේශවලට ද වැසි හෝ ගිඟුරුම් සහිත වැසි ඇතිවිය හැකි අතර, ඇතැම් ස්ථානවලට මිලිමීටර් 75 ට වැඩි තරමක තද වැසි ද අපේක්ෂා කරන බවයි එම දෙපාර්තමේන්තුව වැඩිදුරටත් දැනුම් දුන්නේ.
මේ අතර අධික වර්ෂාවත් සමඟ ගංගා කිහිපයක ජල මට්ටම ඉහළ යෑම හේතුවෙන් ප්‍රදේශ කිහිපයක සුළු ගංවතුර තත්ත්වයක් ඇතිවිය හැකි බවයි වාරිමාර්ග දෙපාර්තමේන්තුව සඳහන් කළේ.
ඒ, අනුව කැළණි, කළු ගංඟාවල මෙන්ම අත්තනගලු ඔයේ ජල මට්ටම් මෙලෙස ඉහළ යා හැකි බව වාරිමාර්ග දෙපාර්තමේන්තුව පැවසුවා.
කැළණි ගඟේ ජල මට්ටම ඉහළ යාම හේතුවෙන් දෙහිඕවිට, රුවන්වැල්ල, සීතාවක, දොම්පේ, හෝමාගම, කඩුවෙළ, බියගම, කොළන්නාව, කොළඹ, වත්තල යන ප්‍රාදේශීය ලේකම් කොට්ඨාස වල පහත් බිම් ප්‍රදේශවලත්,කළු ගගේ ජලමට්ටම් ඉහළ යාම හේතුවෙන් පාලින්ද නුවර සහ බුලත්සිංහල ප්‍රාදේශීය ලේකම් කොට්ඨාසවල පහත් බිම් ප්‍රදේශවලත් සුළු ගංවතුර තත්ත්වයක් ඇතිවීමේ හැකියව පවතිනවා.
එමෙන්ම අත්තනගලු ඔයේ ජල මට්ටම ඉහළ යාම හේතුවෙන් දිවුලපිටිය, මීරිගම, අත්තනගල්ල, මහර, ගම්පහ, මිනුවන්ගොඩ, ජා ඇල, කටාන සහ වත්තල යන ප්‍රාදේශීය ලේකම් කොට්ඨාසවල පහත් බිම්වලත් සුළු ගංවතුර තත්ත්වයක් ඇතිවිය හැකියි.
