අත්‍යවශ්‍ය කටයුතු හැර වෙනත් කිසිවකට ප්‍රතිපාදන ලබාදීමට මුදල් අමාත්‍යාංශයට හැකියාවක් නොමැති බව මුදල් රාජ්‍ය අමාත්‍ය ශෙහාන් සේමසිංහ පවසනවා.
රටේ පවතින ආර්ථික තත්වය හමුවේ මුදල් අමාත්‍යංශය මගින් සිදු කරනු ලබන අසීරු කළමනාකරණයට බාහිර පාර්ශවයන් විසින් දේශපාලන වශයෙන් බාධා කිරීම සහ බලපෑම් කිරීම රට යථා තත්ත්වයට පත් කිරීමට ලබා දෙන සහයක් නොවන බවයි රාජ්‍ය අමාත්‍යවරයා පෙන්වා දෙන්නේ.
රාජ්‍ය සේවකයන්ට වැටුප් ලබාදීම, සමෘද්ධි ඇතුලු සහනාධාර ගෙවීම මෙන්ම සෞඛ්‍ය ක්ෂේත්‍රය පවත්වාගෙන යාම, ජ්‍යෙෂ්ඨ පුරවැසියන්ට ආධාර ලබාදීම වැනි සුබ සාධන කටයුතු රජය සිදු කරනු ලබන්නේ අපහසුතා මධ්‍යයේ බවයි ඔහු පෙන්වා දෙන්නේ.
අමාත්‍යවරයා මේ බව කියා සිටියේ අද අනුරාධපුරයේදී පැවැති මාධ්‍ය හමුවකට එක්වෙමින්.
කෙටි කාලයක් මෙම මුදල් සීමා කිරීම සිදු කළ යුතු වන්නේ දීර්ඝ කාලීන ආර්ථික වර්ධනයක් වෙනුවෙන් බවයි ශෙහාන් සේමසිංහ කියාසිටියේ.
එසේ නොවුණ හොත් ඉදිරියේදී පෝලිම් යුගයක් නැවත නිර්මාණය වනු ඇති බව ද ඔහු අනතරු අගවනවා.
රජයේ කටයුතුවලට බාධා කිරීම රටේ පැවැත්මට ද බාධාවක් බවයි ඔහු කියාසිටියේ.
රජයක් ලෙස එකට කටයුතු කරමින් සිට ජනතා විරෝධය එල්ල වූ පසුව ඉන් ඉවත්ව වෙනත් කඳවුරකට එක්වී තමන් නියෝජනය කල ආණ්ඩුවට චෝදනා කිරීම සදාචාරාත්මක නොවන බව ද ඔහු මෙහිදී සඳහන් කළා.
එවැනි පුද්ගලයන්ට එරෙහිව විනය ක්‍රියාමාර්ග ගත යුතු බවයි අමාත්‍යවරයා කියාසිටියේ.
