හිටපු නියෝජ්‍ය අමාත්‍යවරයෙකුට සිව් වසරක බරපතළ වැඩ සහිත ව සිරදඬුවම් නියම වෙයි

කාන්තාවකගෙන් රුපියල් 50,000ක මුදලක් අල්ලසක් ලෙස ලබා ගැනීමේ චෝදනාවට කොළඹ මහාධිකරණය විසින් වරදකරු කරන ලද හිටපු නියෝජ්‍ය අමාත්‍ය ශාන්ත ප්‍රේමරත්න මහතාට එරෙහිව ලබා දී ඇති සිව් වසරක බරපතළ වැඩ සහිත සිර දඬුවම අභියාචනාධිකරණය විසින් තහවුරු කරනු ලැබුවා.

අද (05) පෙරවරුවේ මෙම නඩුව සම්පත් බී. අබේකෝන් සහ කුමාරන් රත්නම් යන විනිසුරු මඩුල්ල ඉදිරියේ දී විභාගයට ගැනුණු අවස්ථාවේදියි අදාළ නියෝගය නිකුත් කරනු ලැබුවේ.

අදාළ සැකකාර නියෝජ්‍ය අමාත්‍යවරයාව මෙම චෝදනවාට වැරදිකරු කරමින් 2017 නොවැම්බර් මස 02 වැනි දින කොළඹ මහාධිකරණ විනිසුරු පියසේන රණසිංහ විසින් නිකුත් කරනු ලැබුවා.

එම තීන්දුව බල රහිත කරමින් නියෝගයක් නිකුත් කර තමන්ව නිදොස් කර නිදහස් කරන ලෙසටයි හිටපු නියෝජ්‍ය අමාත්‍යවරයා අභියාචනාධිකරණයට අභියාචනයක් ඉදිරිපත් කළේ.

එම අභියාචනය අද විභාගයට ගනිමින් මෙම නියෝගය අභියාචනාධිකරණය විසින් නියෝග කරනු ලැබු අතර වහාම එය ක්‍රියාත්මක කරන ලෙසට ද දැනුම්දුන්නා.

අම්පාර ප්‍රදේශයේ පදිංචි ජී. පුංචිනෝනා නමැත්තියගේ පුත්‍රයාට ලංකා විදුලිබල මණ්ඩලයේ රැකියාවක් ලබාදෙන බව පවසා 2007 නොවැම්බර් මස 01ත් 2007 දෙසැම්බර් මස 26 වැනි යන කාලවකවානුව තුළ දී සැකකාර හිටපු නියෝජ්‍ය අමාත්‍යවරයා විසින් වින්දිත පාර්ශ්වයෙන් අල්ලස් ලබා ගෙන ඇති බවට දන්වමින් අල්ලස් හෝ දූෂණ විමර්ශන කොමිෂන් සභාව මගින් කොළඹ මහාධිකරණයේ නඩුවක් ගොනු කරනු ලැබුවා.