විවිධ රස ගැන්වූ දුම්වැටි තොගයක් ගෙන ආ ගුවන් මගියෙකු අත්අඩංගුවට

විවිධ රස ගන්වන ලද විදෙස් රටක නිෂ්පාදිත දුම්වැටි තොගයක් නීතිවිරෝධී ව මෙරටට ගෙන ආ ගුවන් මගියෙකු කටුනායක ගුවන්තොටුපොළ නිලධාරීන් අත් අඩංගුවට ගෙන තිබෙනවා.

අද (30) පෙරවරුවේ මෙම ගුවන් මගියා ඩුබායි සිට ෆ්ලයි ඩුබායි ගුවන් සේවයේ එෆ්.ඉසෙඩ්.- 597 දරන ගුවන් යානයෙන් කටුනායක ගුවන් තොටුපොළ වෙත පැමිණ සිටියදියි රේගු නිලධාරීන් විසින් අත් අඩංගුවට ගනු ලැබුවේ.

මෙම විදෙස් දුම්වැටි තොගයේ වටිනාකම රුපියල් පනස් නව ලක්ෂ හැත්තෑ දහසක් වටිනාකමක් ඇති බවත් වාර්තා වනවා.

සැකකරු හලාවත, ජයබිම ප්‍රදේශයේ පදිංචි 49 හැවිරිදි, ගුවන් මගින් භාණ්ඩ මෙරටට රැගෙනවිත් අලෙවි කිරීමේ නිරත ව්‍යාපාරිකයෙක්.

ඔහු විසින් රැගෙන එන ලද ගමන් මළු 03ක විවිධ රස ගන්වන ලද “මැන්චෙස්ටර්” සහ ” ප්ලැටිනම්” වර්ගයේ දුම්වැටි 39,800ක අඩංගු දුම්වැටි කාටූන් 199ක් සඟවා තිබියදී රේගු නිලධාරීන් විසින් සොයාගනු ලැබුවා.

කටුනායක ගුවන් තොටුපොළ රේගු නිලධාරීන් විසින් මෙම ව්‍යාපාරිකයා සහ ඔහු විසින් නීතිවිරෝධී ලෙස රැගෙන ආ දුම්වැටි තොගය අත්අඩංගුවේ තබාගෙන මේ පිළිබඳ වැඩිදුර විමර්ශන කටයුතු සිදු කරමින් පවතිනවා.