සංවිධානාත්මක අපරාධ කල්ලි සාමාජික අරුමාහන්දි ජනිත් මධුසංක හෙවත් ‘පොඩි ලැසී’ට අධිචෝදනා භාර දී තිබෙනවා.
ඒ, බූස්ස බන්ධනාගාරයේ දී බන්ධනාගාර කොමසාරිස්වරයා ඇතුළු නිලධාරීන් කිහිපදෙනෙකුට ප්‍රසිද්ධියේ මරණ තර්ජන එල්ල කිරීමේ චෝදනාව සම්බන්ධයෙන්.
සැකකරු අද (17) ගාල්ල මහාධිකරණ විනිසුරු කාවින්ද්‍යා නානායක්කාර හමුවට ඉදිරිපත් කෙරුණු අතර එහිදීයි මෙම අධිචෝදනා භාරදීම සිදු කළේ.
එහිදී අධිචෝදනා ගොනුකිරීමෙන් පසු විත්තිකරු වෙනුවෙන් පෙනී සිටි නීතීඥවරුන් කරන ලද ඇප ඉල්ලීම සළකා බැලූ මහාධිකරණ විනිසුරුවරිය විත්තිකරුට ඇප නියම කළා.
ඒ, අනුව රුපියල් 50,000 ක මුදල් ඇපයක් සහ රුපියල් ලක්ෂ 05 බැගින් වූ ශරීර ඇප හතරක් අධිකරණය විසින් නියම කරනු ලැබූ අතර නඩුව යළි ලබන වසරේ ජනවාරි 31 වනදා දක්වා කල් තැබීමටයි නියෝග කරනු ලැබුවේ.
අපරාධ රැසක් සම්බන්ධයෙන් අත්අඩංගුවට ගෙන බූස්ස බන්ධනාගාරයේ රඳවා සිටිය දී පසුගිය 2020 වසරේ ජුනි 26 වනදා පොඩි ලැසී විසින් බන්ධනාගාර නිලධාරීන්ට මරණ තර්ජන සිදුකර තිබුණා.
