විවිධ වංචනික ක්‍රියාවන්ට සම්බන්ධ සැක සහිත තොරතුරු තාක්ෂණ සමාගම් විසින් තොරතුරු තාක්ෂණ (IT) අංශයේ තනතුරු සඳහා ශ්‍රී ලාංකිකයන් තායිලන්තයේ රැකියා සඳහා පොළඹවන බවට මෑතකදී නිරීක්ෂණය වී ඇතැයි තායිලන්තයේ ශ්‍රී ලංකා දූත මණ්ඩලය පවසනවා.
වින්දිතයන් නීතිවිරෝධී ලෙස තායිලන්තයේ සිට බොහෝ දුරට මියන්මාරයට දේශසීමා හරහා ගෙන යන අතර දැඩි සීමා සහිත කොන්දේසි යටතේ වැඩ කිරීම සඳහා වහල්භාවයේ තබා ඇති බවටයි වාර්තා වන්නේ.
මෙම වින්දිතයන්ගෙන් ඇතැමෙකු නීති විරෝධී ලෙස රටට ඇතුළු වීම සම්බන්ධයෙන් ආරක්ෂක බලධාරීන් විසින් අත්අඩංගුවට ගෙන ඇතැයි සඳහන්.
මෙම විපතට පත් සියලුම ශ්‍රී ලාංකිකයින් සංචාරක වීසා මත තායිලන්තයට පැමිණ ඇති අතර, පැමිණීමෙන් පසු රැකියා වීසා බවට පරිවර්තනය කරන බවට පොරොන්දු වූ නමුත් එය සාර්ථක වී නොමැති බවටයි අනාවරණ වී ඇත්තේ.
එබැවින් එවැනි වංචනික රැකියා දීමනාවලට නොරැවටෙන ලෙස ශ්‍රී ලාංකික ජනතාවට උපදෙස් දෙන අතර ඕනෑම රැකියා දීමනාවක් ලබා ගැනීමට පෙර ඉතා ප්‍රවේශම් සහගතව බඳවා ගැනීමේ නියෝජිතයින් මෙන්ම ඕනෑම සමාගමක පසුබිම සම්බන්ධ තොරතුරු තහවුරු කර ගන්නා ලෙසට දැනුම් දෙනවා.
එමෙන්ම මේ සම්බන්ධයෙන් තායිලන්ත ආගමන කාර්යාංශයේ www.immigration.go.th වෙබ් අඩවියෙන් තොරතුරු ලබා ගන්නා ලෙසටයි ශ්‍රී ලංකා තානාපති කාර්යාලය සහ ස්ථිර දූත මණ්ඩලය ප්‍රකාශ කළේ.
