ඩ්‍රෝන යානාවක් යොදා ගනිමින් අග්බෝ හස්ථීයාගේ සමීප දසුන් ලබා ගනිමින් සිටි පිරිසක් ඩ්‍රෝන යානාවක් ද සමග සැකපිට පොලිස් අත්අඩංගුවට ගෙන තිබෙනවා.
අද සවස මෙම පිරිස තිරප්පනය පොලිස් ස්ථානය මගින් මෙලෙස අත්අඩංගුවට ගෙන ඇති බවයි අප වාර්තාකරු සඳහන් කළේ.
වෙඩි වැදීමකින් පාදයට ඇති වූ තුවාල හේතුවෙන් පශු වෛද්‍ය ප්‍රතිකාර ලබමින් සිටින අග්බෝ හස්ථියා මේ වනවිට තිරප්පනය ප්‍රදේශයේ සැරිසරමින් සිටිනවා.
අද සවස තිරප්පනේ උලගල්ල වැවේ එම හස්ථියා රැදී සිටි අවස්ථාවේ එහි පැමිණි කිසියම් පිරිසක් මෙලෙස ඩ්‍රෝන යානාවක් ආධාරයෙන් එම හස්තියාගේ වීඩියෝ දර්ශණ ලබා ගැනීමට කටයුතු කර තිබුණා.
එහිදී අදාළ ඩ්‍රෝන යානාව ගුවන් ගත කිරීම සම්බන්ධයෙන් ගුවන් හමුදාවට ලැබුණු තොරතුරක් පොලිසියට දැනුම් දීමට ගුවන් හමුදාව පියවර ගෙන තිබුණා.
ඒ අනුව ක්‍රියාත්මක වූ පොලිස් නිලධාරීන් අදාළ ඩ්‍රෝන යානය සමග එය ගුවන්ගත කළ බව කියන පුද්ගලයින් 4 දෙනෙකු ප්‍රශ්ණ කිරීම සඳහා අත්අඩංගුවට ගෙන තිබෙනවා.
සැකකරුවන් සන්තකයේ තිබී පොලිස් භාරයට ගෙන ඇති ඩ්‍රෝන යානාව සම්බන්ධයෙන් ශ්‍රී ලංකා ගුවන් හමුදාවේ නිලධාරීන් පිරිසක් විමර්ශණ ආරම්භ කර ඇතැයි සඳහන්.
සිද්දිය සම්බන්ධයෙන් තිරප්පනය පොලිසියයි වැඩිදුර විමර්ශණ සිදු කරනු ලබන්නේ.
