අරගලය පැවති සමයේ වැඩ බලන ජනාධිපතිවරයා ලෙස රනිල් වික්‍රමසිංහ විසින් නිකුත් කළ හදිසි නීති රෙගුලාසිවලින් ආණ්ඩුක්‍රම ව්‍යවස්ථාව යටතේ සහතික කර තිබෙන මූලික මිනිස් අයිතිවාසිකම් උල්ලංඝනය වීමක් සිදුනොවන බව නීතිපතිවරයා අද (03) ශ්‍රේෂ්ඨාධිකරණය හමුවේ ප්‍රකාශ කළා.
එම හදිසි නීති රෙගුලාසිවලින් ආණ්ඩුක්‍රම ව්‍යවස්ථාව යටතේ සහතික තිබෙන මූලික මිනිස් අයිතිවාසිකම් උල්ලංඝනය වන බවට තීන්දුවක් ලබාදෙන ලෙස ඉල්ලා ගොනු කර තිබූ මූලික අයිතිවාසිකම් පෙත්සම් අද විභාගයට ගත් අවස්ථාවේදී නීතිපතිවරයා වෙනුවෙන් පෙනී සිටි ජේෂ්ඨ රජයේ නීතිඥ ශමින්ද වික්‍රම මේ බව සඳහන් කර සිටියා.
මුර්දු ප්‍රනාන්දු, යසන්ත කෝදාගොඩ සහ අර්ජුන ඔබේසේකර යන මහත්ම මහත්මීන්ගෙන් සමන්විත ත්‍රිපුද්ගල ශ්‍රේෂ්ඨාධිකරණ විනිසුරු මඩුල්ල ඉදිරියේ මෙම පෙත්සම් විභාගය පැවැත් වුණා.
ජ්‍යෙෂ්ඨ රජයේ නීතිඥවරයා පැවසුවේ අරගලය පැවති සමයේ රටේ නීතියේ ආධිපත්‍ය හා ජන ජීවිතය බාධාවකින් තොරව පවත්වාගෙන යාමේ අරමුණින් ජනාධිපතිවරයා විසින් මෙම හදිසි නීති රෙගුලාසි ප්‍රකාශයට පත් කළ බවයි.
රට තුළ ඇති වූ හදිසි අවශ්‍යතාවයක් සැලකිල්ලට ගෙන එම රෙගුලාසි පැනවීමට ජනාධිපතිවරයාට සිදු වූ බවයි ඔහු පැවසුවේ.
එම රෙගුලාසි වල අඩුලුහුඩකම් පවතිනවා නොවේදැයි මෙහිදී විනිසුරුවරු විසින් ජ්‍යෙෂ්ඨ රජයේ නීතිඥවරයාගෙන් ප්‍රශ්න කර සිටියා.
එම අවස්ථාවේදී ජ්‍යෙෂ්ඨ රජයේ නීතිඥවරයා පැවසුවේ එම කාරණය සම්බන්ධයෙන් උපදෙස් ලබාගෙන කරුණු දැක්වීම සඳහා කාලය අවශ්‍ය බවයි.
මෙහිදී විනිසුරු මඩුල්ල විසින්ජ රජයේ නීතිඥවරයාට පෙන්වා දුන්නේ වගඋත්තර කරුවන් විසින් ශ්‍රේෂ්ඨාධිකරණය හමුවේ ගොනු කර තිබෙන දිවුරුම් ප්‍රකාශයට පරිබාහිරව කරුණු ඉදිරිපත් කිරීමට අවස්ථාව ලබාදිය නොහැකි බවයි.
එබැවින් නිශ්චිත නීතිමය රාමුව තුළ එම කරුණු ඉදිරිපත් කිරීමට පියවර ගන්නා ලෙසත් මෙහි දී විනිසුරු මඩුල්ල විසින් සඳහන් කර සිටියා.
ඉන් අනතුරුව වැඩිදුර පෙත්සම් විභාගය ඔක්තෝබර් මස 11 වනදා තෙක් කල් දැමුණා.
විකල්ප ප්‍රතිපත්ති කේන්ද්‍රය සහ එහි විධායක අධ්‍යක්ෂ ආචාර්ය පාක්‍යසෝති සරවනමුත්තු, ශ්‍රී ලංකා මානව හිමිකම් කොමිසමේ හිටපු කොමසාරිස්වරියක වන ආචාර්ය අම්බිගා සත්කුණ නාදන් සහ ලිබරල් තරුණ ව්‍යාපාරය විසින් මෙම මූලික අයිතිවාසිකම් පෙත්සම් ඉදිරිපත් කර තිබුණා.
එහි වගඋත්තරකරුවන් ලෙස ජනාධිපතිවරයා වෙනුවෙන් නීතිපතිවරයා, හිටපු ජනාධිපති ලේකම් ගාමිණී සෙනරත්, වත්මන් ජනාධිපති ලේකම් සමන් ඒකනායක, ආරක්ෂක අමාත්‍යංශ ලේකම් කමල් ගුණරත්න යන අය නම් කර තිබෙනවා.
