ශ්‍රී ලංකාවේ මහජන චීන සමූහාණ්ඩු තානාපති කාර්යාලයේ අලුතින් පත් වූ ආරක්ෂක උපදේශක ජ්‍යේෂ්ඨ කර්නල් FU Xiao ඊයේ (15) නියෝජ්‍ය ආරක්ෂක අමාත්‍ය විශ්‍රාමික මේජර් ජෙනරල් අරුණ ජයසේකර හමු වුණා.
මෙම සාකච්ඡාව අතරතුර, නියෝජ්‍ය අමාත්‍යවරයා සහ චීන ආරක්ෂක උපදේශකවරයා අතර ද්විපාර්ශ්වික ආරක්ෂක සබඳතා මෙන්ම අන්‍යෝන්‍ය වශයෙන් වැදගත් වන කරුණු පිළිබඳව සුහද සාකච්ඡාවක් පැවැත් වුණා.
ශ්‍රී ලංකා සන්නද්ධ හමුදාවන්හි පුහුණු කටයුතු සහ වෘත්තීය සංවර්ධනය වෙනුවෙන් චීනය ලබා දෙන දිගුකාලීන ආරක්ෂක සහයෝගීතාව නියෝජ්‍ය අමාත්‍යවරයා මෙහිදී විශේෂ ඇගයීමකට ලක් කළා.
ශ්‍රී ලංකා හමුදාව ගොඩබිම් ආරක්ෂක ක්‍රියාන්විතවලට පමණක් සීමා නොවී, මුහුදු සීමා ආරක්ෂක කටයුතු පිළිබඳ අවබෝධය වැඩිදියුණු කිරීමට පියවර ගනිමින් සිටින බව පෙන්වා දුන් ඔහු, රටේ නොබැඳි විදේශ ප්‍රතිපත්තිය උදෙසා වන කැපවීම ද යළිත් සහතික කරනු ලැබුවා.
මත්ද්‍රව්‍ය ජාවාරම, අවි ආයුධ වෙළඳාම සහ තැනැත්තන් වෙළඳාම මැඩපැවැත්වීම සඳහා වන සමුද්‍රීය ආරක්ෂාව ශක්තිමත් කිරීම මෙන්ම, උසස් තාක්‍ෂණය ඒකාබද්ධ කිරීම, ඒකාබද්ධ පුහුණු වැඩසටහන් සහ ආපදා කළමනාකරණය ඇතුළු අනාගත සහයෝගීතාවන් සඳහා වන ප්‍රධාන ක්ෂේත්‍ර කිහිපයක් පිළිබඳව දෙපාර්ශවයම මෙහිදී සාකච්ඡා කළා.
චීන තානාපති කාර්යාලයේ නියෝජ්‍ය ආරක්ෂක උපදේශක සහ නාවික ආරක්ෂක උපදේශක ද මෙම අවස්ථාවට සහභාගීව සිටියා.
