ගණේමුල්ල සංජීව ඝාතන සිද්ධියේ සැකකාරියක වශයෙන් නම්කර සිටින නීතීඥවරිය රක්ෂිත බන්ධනාගාර ගත කරන ලෙස නියෝග කර තිබෙනවා.
ඒ, අනුව සැකකාරිය ලබන 07 වනදා දක්වා රක්ෂිත බන්ධනාගාර ගත කිරීමටයි කොළඹ ප්‍රධාන මහේස්ත්‍රාත් අසංග එස්. බෝදරගම මහතා අද (27) නියෝග කළේ.
ත්‍රස්තවාදය වැළැක්වීමේ පනත යටතේ රඳවාගෙන සිටි තමරා කුමාරි අබේරත්න නම් නීතීඥවරිය අපරාධ පරීක්ෂණ දෙපාර්තමේන්තුව විසින් අද (27) දිනයේ අධිකරණය වෙත ඉදිරිපත් කරනු ලැබුවා.
ඒ, අදාළ රැඳවුම් නියෝග අවසන් වීමෙන් පසුවයි.
ගණේමුල්ල සංජීව ඝාතනය සඳහා පැමිණි ඉෂාරා සෙව්වන්දි නැමැත්තියට පිස්තෝලය සඟවා රැගෙන ඒමට දණ්ඩ නීති සංග්‍රහයේ පිටපතක් ලබා දී ඇත්තේ මෙම නීතීඥවරිය බවයි අධිකරණයේදී කරුණු අනාවරණය වී තිබුණේ.
ඒ අනුව සැකකාර මෙම නීතීඥවරිය 2025 වසරේ ඔක්තෝම්බර් මස 28 වනදා කඩවත ප්‍රදේශයේදී අපරාධ පරීක්ෂණ දෙපාර්තමේන්තුව විසින් අත්අඩංගුවට ගනු ලැබුවා.
