කොළඹ වරායේ අනතුරකින් පුද්ගලයෙක් මරුට

කොළඹ වරාය පරිශ්‍රයේ බර අඬු එසවුම් යන්ත්‍රයක් යතුරුපැදියක ගැටී දරුණු අනතුරක් සිදුව තිබෙනවා.

ඊයේ (19) පස්වරුවේ මෙම අනතුර සිදුව ඇති අතර, අනතුරින් එක් පුද්ගලයෙක් ජීවිතක්ෂයට පත්ව ඇති බවයි පොලිසිය සඳහන් කළේ.

වරාය පරිශ්‍රයේ අදියර තුනේ සිට අදියර දෙක දෙසට ධාවනය කළ බර අඬු එසවුම් යන්ත්‍රයක්, ඉදිරියෙන් එම දිශාවටම ධාවනය කළ යතුරුපැදියක ගැටී මෙම අනතුර සිදුව තිබෙනවා.

අනතුරින් යතුරුපැදියේ පසුපැදිකරු තුවාල ලබා කොළඹ ජාතික රෝහලට ඇතුළත් කිරීමෙන් පසු මියගොස් ඇති බවයි වාර්තා වුණේ.

මියගිය පුද්ගලයා වයස අවුරුදු ‍40ක රිදීගම ප්‍රදේශයේ පදිංචිකරුවෙක්.

අනතුරට සම්බන්ධ බර අඬු එසවුම් යන්ත්‍රයේ රියැදුරු අත්අඩංගුවට ගෙන ඇති අතර, වෙරළබඩ පොලිසිය වැඩිදුර විමර්ශන සිදුකරනු ලබනවා.