චීනයේ වැඩිවන බලපෑමට සහ උතුරු කොරියානු න්‍යෂ්ටික තර්ජනයට එරෙහි ව ඒකාබද්ධ මිලිටරි මෙහෙයුම් වැඩිදියුණු කිරීමට සහ ගුවන් ආරක්ෂක මිසයිල සම-නිෂ්පාදනය පුළුල් කිරීමට ජපානයේ එක්සත් ජනපද හමුදා අණදෙන ව්‍යුහය ප්‍රතිසංස්කරණය කරන බව එක්සත් ජනපදය සහ ජපානය ප්‍රකාශ කළා.
එක්සත් ජනපද රාජ්‍ය ලේකම් ඇන්ටනි බ්ලින්කන්, ආරක්ෂක ලේකම් ලොයිඩ් ඔස්ටින් සහ ඔවුන්ගේ ජපාන සගයන් වන විදේශ අමාත්‍ය යෝකෝ කමිකාවා, ආරක්ෂක ඇමති මිනෝරු කිහාරා සහභාගී වූ සාකච්ඡාවල ප්‍රධාන ප්‍රතිඵලවලින් එකක් ලෙස මෙය සැලකෙනවා.
ඉරිදා සාකච්ඡාවලින් පසුව නිකුත් කරන ලද ඒකාබද්ධ ප්‍රකාශයක, දෙරට අතර අන්තර් ක්‍රියාකාරීත්වය සහ සහයෝගීතාව සඳහා පහසුකම් සැලසීම සඳහා එක්සත් ජනපදය, එක්සත් ජනපද ඉන්දු-පැසිෆික් අණදෙන නිලධාරියා වෙත වාර්තා කරන ඒකාබද්ධ බලකා මූලස්ථානයක් ලෙස එක්සත් ජනපද හමුදා ජපානය (USFJ) ප්‍රතිසංවිධානය කිරීමට අදහස් කරන බව දැක්වුණා.
ප්‍රතිසංවිධානය කරන ලද USFJ ජපානයේ ගොඩබිම්, සමුද්‍රීය සහ ගුවන් සේවාවල අණදීම සඳහා මාර්තු මාසය වන විට දියත් කෙරෙන ජපන් ආත්මාරක්ෂක බලකායේ ඒකාබද්ධ මෙහෙයුම් මූලස්ථානයේ වැදගත් සහකරු ලෙස සේවය කිරීමට අදහස් කරන බව එහි සඳහන්.
මෙම සාකච්ඡාවලට පෙර, කිහාරා, ඔස්ටින් සහ දකුණු කොරියානු ආරක්ෂක ඇමති ෂින් වොන්-සික් හමුවී ඔවුන්ගේ පළමු ත්‍රෛපාර්ශ්වික ආරක්ෂක සාකච්ඡා සඳහා ටෝකියෝවේ සත්කාරකත්වය ලබා දුන් අතර එහිදී ත්‍රෛපාර්ශ්වික ගිවිසුමකට ද අත්සන් තැබුවා.
මෙම හමුවේදී, ආරක්ෂක ප්‍රධානීන් දකුණු චීන මුහුද ඇතුළු ඉන්දු-පැසිෆික් කලාපයේ මෑත කාලීන සමුද්‍රීය සහ ගුවන් හමුදා ක්‍රියාකාරකම් පිළිබඳ ඔවුන්ගේ අදහස් බෙදා ගත් බව පෙන්ටගනය නිවේදනය කළා.
රුසියාව සහ උතුරු කොරියාව අතර වැඩිවන මිලිටරි සහ ආර්ථික සහයෝගීතාව පිළිබඳ ව එක්සත් ජනපදය, ජපානය සහ දකුනු කොරියානු ආරක්ෂක ප්‍රධානීන් “දැඩි කනස්සල්ල” ප්‍රකාශ කර තිබෙනවා.
