අනුරාධපුරයට එන බැතිමතුන්ට විශේෂ දැනුම්දීමක්

පොසොන් උත්සව සමයේ අනුරාධපුර නගරය සහ ඒ අවට පූජා භූමි ආශ්‍රිතව පොලිසිය විශේෂ ආරක්ෂක වැඩපිළිවෙලක් ක්‍රියාත්මක කර තිබෙනවා.

නිවේදනයක් නිකුත් කරමින් පොලිසිය සඳහන් කළේ පොලිස් නිලධාරීන් 2500ක් සහ සිවිල් ආරක්ෂක බලකායේ නිලධාරීන් 900ක් පමණ මෙම ආරක්ෂක වැඩසටහනට එක්වන බවයි.

පොසොන් උත්සවයට පැමිණෙන රථ වාහන ගාල් කිරීම සඳහා අනුරාධපුර පූජා නගරය මූලික කර ගනිමින් රථ ගාල් 20ක් සහ මිහින්තලයේ රථ ගාල් 6ක් ස්ථාපිත කර තිබෙනවා.

බැතිමතුන් සඳහා විවේකීව කාලය ගත කිරීම වෙනුවෙන් අනුරාධපුරයේ ගිමන් හරින ස්ථාන 6ක් සහ මිහින්තලේ නගරයේ ස්ථාන 5ක් සූදානම් කර ඇති බවයි පොලිසිය සඳහන් කළේ.

මෙම ප්‍රදේශවල බැතිමතුන් විසින් පරිහරණය කරනු ලබන වැව් හා ජලාශ ආවරණය වන පරිදි පොලිස් ජීවිතාරක්ෂක නිලධාරීන් 150කට අධික පිරිසක් ද ශ්‍රී ලංකා ජීවිතාරක්ෂක සංගමයේ සාමාජිකයන් 130ක් පමණ ද නාවික හමුදා නිලධාරීන් 15ක්, සිවිල් ආරක්ෂක බලකා ජීවිතාරක්ෂක නිලධාරීන් 40ක් වශයෙන් නිලධාරීන් 355ක පමණ පිරිසක් ද යොදවා තිබෙනවා.

බැතිමතුන් වැඩි වශයෙන් භාවිත කරනු ලබන වැව් හා ජලාශ ආශ්‍රිතව බෝට්ටු යොදවා බැතිමතුන්ගේ ආරක්ෂාවට ද පියවර ගෙන ඇති බවයි පොලිසිය සඳහන් කළේ.

වන්දනාවේ පැමිණෙන තරුණ පිරිස් සහ අනෙක් පුද්ගලයන් මත්පැන්, මත්ද්‍රව්‍ය ඇතුලු නීති විරෝධී ද්‍රව්‍ය රැගෙන පැමිණීම වැළැක්වීම සඳහා පූජා නගරය වෙත පිවිසීමට ඇති ප්‍රධාන මාර්ග ආවරණය වන පරිදි මාර්ග බාධක 8ක් පමණ සහ පූජා භූමිය තුල මාර්ග බාධක 7ක් පමණ ස්ථාපිත කර තිබෙනවා.

මෙම කාලසීමාව තුල අනුරාධපුර පොසොන් කලාපය තුළ පැය 24 පුරා විශේෂ පොලිස් මෙහෙයුම් මැදිරියක් ක්‍රියාත්මක වන අතර බැතිමතුන්ට හදිසි තත්ත්වයකදී දැනුම්දීම සඳහා එම මැදිරියේ 025 2222226 යන අංකය භාවිත කළ හැකියි.