අම්බලන්ගොඩ නගරයේ පිහිටි වෙළෙඳ ආයතනයක කළමණාකරුවෙකු අද (22) උදෑසන වෙඩි තබා ඝාතනය කිරීමේ සිද්ධියේ වෙඩික්කරුවන් පැමිණි බවට සැක කෙරෙන යතුරුපැදිය පොලිසිය විසින් සොයාගෙන තිබෙනවා.
අම්බලන්ගොඩ, කුරුඳුවත්ත, ආදාදොළ මාර්ගයේ දමාගොස් තිබිය දී මෙම යතුරුපැදිය අද පෙරවරුවේ සොයාගෙන ඇති බවයි වාර්තා වුණේ.
යතුරුපැදියකින් පැමිණි දෙදෙනෙකු විසින්, ජනප්‍රිය වෙළඳ ආයතනයක අම්බලන්ගොඩ නගරයේ පිහිටි ප්‍රදර්ශනාගරය තුළ දී එහි කළමණාකරු ලෙස කටයුතු කළ පුද්ගලයා අද උදෑසන වෙඩි තබා පළාගොස් තිබුණා.
මෙලෙස ඝාතනයට ලක්ව ඇත්තේ අම්බලන්ගොඩ ප්‍රදේශයේ පදිංචිව සිටි හිරාන් කෝසල නැමැති පුද්ගලයෙක්.
අපරාධ කල්ලි දෙකක් අතර ඇතිවූ ගැටුමක ප්‍රතිපලයක් මත මෙම වෙඩි තැබීම සිදුව ඇති බව පොලීසිය සැක පළකරනවා.
වෙඩි ප්‍රහාරයෙන් ජීවිතක්ෂයට පත්වූ පුද්ගලයා ද අපරාධ කල්ලි සාමාජිකයින් සමග සම්බන්ධතා පැවැත්වූ අයෙකු බවටත් තොරතුරු අනාවරණය වී ඇති බවයි පොලිසිය සඳහන් කළේ.
එමෙන්ම ඔහු පසුගිය පළාත් පාලන මැතිවරණයේ දී අම්බලන්ගොඩ නගර සභාවට තරග කිරීමට සමගි ජනබලවේග පක්ෂයෙන් ඉදිරිපත් වූ අපේක්ෂකයෙක් බවට ද තොරතුරු වාර්තා වනවා.
මේ අතර දකුණු පළාත භාර ජ්‍යෙෂ්ඨ නියෝජ්‍ය පොලිස්පති කිත්සිරි ජයලත්ගේ සෘජු අධීක්ෂණය යටතේ වෙඩි තැබීම සම්බන්ධයෙන් විමර්ශනය සඳහා පොලිස් කණ්ඩායම් තුනක් පත්කර තිබෙනවා.
