එල්.ටී.ටී.ඊ ත්‍රස්ත සංවිධානයේ සාමාජිකයෙකුට කැනඩාවේ පුරවැසිභාවය ලබාගැනීම සඳහා සහාය පළකර ඇති බවට ශ්‍රී ලංකා සම්භවයක් සහිත කැනඩාවේ මහජන ආරක්ෂක අමාත්‍ය ගැරී ආනන්දසංගරීට චෝදනා එල්ල වී තිබෙනවා.
එල්.ටී.ටී.ඊ සාමාජිකයෙක් වන සෙන්තුරන් සෙල්වකුමාර් නැමැත්තෙකුට කැනඩාවේ පුරවැසිභාවය ගැනීමට සහය පළ කිරීම සඳහා ගැරී ආනන්දසංගරී විසින් ලිපි දෙකක් යොමු කර ඇති බවයි චෝදනා එල්ල වී ඇත්තේ.
කැනේඩියානු දේශ සීමා නියෝජිත ආයතනය වෙත අදාළ ලිපි 2016 සහ 2023 යන වසරවල දී යොමුකර ඇති බව සඳහන්.
අදාළ පුද්ගලයා එල්.ටී.ටී.ඊ සංවිධානයට සම්බන්ධ බව එරට ආගමන හා විගමන දෙපාර්තමේන්තුව විසින් තහවුරු කරගෙන ඇති අතර, ඒ හේතුවෙන් අවස්ථා කිහිපයකදීම අදාළ අයදුම් පත්‍රය ප්‍රතික්ෂේප කර ඇති බවයි වාර්තා වන්නේ.
මානුෂීය කරුණු පිළිබඳ සලකා බලා සෙන්තුරන් සෙල්වකුමාර්ට කැනඩාවේ නිත්‍ය පුරවැසිභාවය ලබාදීමට පියවර ගන්නා ලෙසයි ගැරී ආනන්දසංගරී අදාළ ලිපි මගින් ඉල්ලීම් කර ඇති බව සඳහන්.
ඒ අනුව ත්‍රස්ත සංවිධානයක සමාජිකයෙකුට සහාය ලබාදීම තුළින් එවකට පාර්ලිමේන්තු මන්ත්‍රීවරයෙකු ලෙස කටයුතු කළ ගැරී ආනන්දසංගරී ත්‍රස්තවාදයට සහය පළ කිරීමක් සිදුකර ඇති බවයි ඔහුට එරෙහිව එල්ල වී ඇති චෝදනාවල දැක්වෙන්නේ.
මේ අතර මෙම චෝදනා සම්බන්ධයෙන් කැනේඩියානු මහජන ආරක්ෂක අමාත්‍යවරයාගේ කාර්යාලය නිවේදනයක් නිකුත් කරමින් ප්‍රකාශ කර ඇත්තේ අදාළ සිදුවීම සම්බන්ධයෙන් අධිකරණය ඉදිරියේ නඩුවක් විභාග වන බැවින් ඒ පිළිබඳ නිශ්චිත කරුණු දැක්වීමක් සිදුකළ නොහැකි බවයි.
මේ අතර මෙම සිද්ධිය සම්බන්ධයෙ අදහස් දක්වා සිටි කැනඩා අගමැති මාර්ක් කාර්නි සඳහන් කර ඇත්තේ මහජන ආරක්ෂක අමාත්‍යවරයා කෙරෙහි තමාට තවමත් විශ්වාසයක් ඇති බවයි.
