2026 පන්දුවාර 20-20 ලෝක කුසලාන තරඟාවලියේ දී බංග්ලාදේශ කණ්ඩායමේ තරඟ පැවැත්වෙන ස්ථාන වෙනස් කරන ලෙස ඉල්ලා සිටින ලෙස බංග්ලාදේශ අන්තර්කාලීන රජය බංග්ලාදේශ ක්‍රිකට් මණ්ඩලයට උපදෙස් දී තිබෙනවා.
ඒ, අනුව ලෝක කුසලාන තරගාවලියේ දී බංග්ලාදේශ කණ්ඩායම ඉන්දියාව තුළ සහභාගීවන තරග සියල්ල ඉන්දියාවෙන් ඉවත් කරන ලෙස ඉල්ලා ඇති බවයි තොරතුරු වාර්තා වන්නේ.
ඊයේ (03) දිනයේ සමාජ මාධ්‍ය සටහනක් තබමින් බංග්ලාදේශ ක්‍රීඩා උපදේශක අසිෆ් නස්රුල් විසින් මෙම තීරණය තහවුරු කරනු ලැබුවා.
තරඟාවලියේදී බංග්ලාදේශයේ තරඟ සඳහා විකල්ප ස්ථානයක් ලෙස ශ්‍රී ලංකාව යෝජනා කරන ලෙසත් අන්තර්කාලීන රජය බංග්ලාදේශ ක්‍රිකට් මණ්ඩලයට නියෝග කර ඇති බවයි අසිෆ් නස්රුල් පවසන්නේ.
මේ අතර ඉන්දීය ක්‍රිකට් පාලක මණ්ඩලයේ උපදෙස් මත කොල්කටා නයිට් රයිඩර්ස් සංචිතයෙන් බංග්ලාදේශ වේගපන්දු යවන ක්‍රීඩක මුස්තාෆිසුර් රහ්මාන් ඉවත් කිරීමෙන් පසුව අයි.පී.එල් තරග බංග්ලාදේශය තුළ විකාශනය නවතා දැමීමේ තීරණයකට එළඹීමට නියමිත බවයි ක්‍රීඩා මාධ්‍ය තොරතුරු වාර්තා කරන්නේ.
බංග්ලාදේශයේ හින්දු සුළුතරයන්ට පහරදීම් පිළිබඳ වාර්තා මධ්‍යයේ බංග්ලාදේශ ක්‍රීඩක මුස්තාෆිසුර් රහ්මාන් සංචිතයෙන් ඉවතට දමන ලෙස ඉන්දියාව තුළ පසුගිය දින කිහිපයේ දැඩි මතවාදයක් ගොඩ නැඟුනා.
