කෘත්රිම බුද්ධියට (AI) සරලව අනුගත වීම පමණක් නොව, ප්රතිපත්ති, ආචාරධර්ම සහ සියලුදෙනා ඇතුළත් පාලන ක්රමවේදයන් මඟින් එහි අනාගතය හැඩගැස්වීමට ශ්රී ලංකාව කටයුතු කළ යුතු බව අග්රාමාත්ය ආචාර්ය හරිනි අමරසූරිය ඊයේ (08) දින කොළඹ විශ්වවිද්යාලයේ සෙනෙට් ශාලාවේ දී පැවති රාජ්ය විශ්වවිද්යාල සඳහා AI ප්රතිපත්ති රාමුව දියත් කිරීමේ උත්සවයේ ප්රධාන ආරාධිත අමුත්තා ලෙස සහභාගී වෙමින් සඳහන් කළා.
ශ්රී ලංකාවේ ඇමරිකානු එක්සත් ජනපද තානාපති කාර්යාලය සමඟ එක්ව විශ්වවිද්යාල ප්රතිපාදන කොමිෂන් සභාව විසින් මෙහෙයවන ලද රාජ්ය විශ්වවිද්යාල සඳහා AI ප්රතිපත්ති රාමුව දියත් කිරීමේ මෙම වැඩසටහන මඟින්, ශ්රී ලංකාවේ විශ්වවිද්යාල පද්ධතිය තුළ කෘත්රිම බුද්ධිය සදාචාරාත්මක ලෙස සහ වගකීමකින් යුතුව යොදා ගැනීම සඳහා පුහුණු කිරීමට ප්රතිපත්ති රාමුවක් සකස් කිරීම කෙරෙහි අවධානය යොමු කර තිබෙනවා.
මෙම අවස්ථාවට සමගාමීව ප්රතිපත්ති සම්පාදකයින් සහ AI විශේෂඥයින් එක්ව AI ප්රතිපත්ති රාමුව පිළිබඳව සහ එය ක්රියාත්මක කිරීම සම්බන්ධයෙන් පැහැදිලි කරනු ලැබුවා.
මෙම වැඩසටහනෙහි පිළිගැනීමේ කතාව විශ්වවිද්යාල ප්රතිපාදන කොමිෂන් සභාවේ සභාපති ජ්යෙෂ්ඨ මහාචාර්ය කපිල සෙනෙවිරත්න විසින් සිදු කරන ලද අතර, UGC හි උප සභාපති මහාචාර්ය කේ. එල්. වසන්ත කුමාර යෝජිත ක්රියාත්මක කිරීමේ සැලසුම් ඉදිරිපත් කළා.
මෙම අවස්ථාවට සහභාගී වෙමින් අදහස් දැක්වූ අග්රාමාත්යවරිය, වේගයෙන් වෙනස්වන තාක්ෂණය, විශේෂයෙන්ම කෘතිම බුද්ධිය තුළ අවස්ථා මෙන්ම අවදානම ද අන්තර්ගත වන බව අවධාරණය කළා.
“අපි වර්තමානයේ කටයුතු කරමින් සිටින්නේ ඉතා වේගයකින් වෙනස්වන තාක්ෂණයක් සමගයි. ඒ නිසා එහි නිසි භාවිතය සඳහා ප්රතිපත්ති මෙන්ම පාලනය සහ ක්රියාත්මක කිරීම සඳහා ශක්තිමත් පද්ධති තිබීම අත්යවශ්යයි,” යනුවෙන් අග්රාමාත්යවරිය සඳහන් කළා.
විශ්වවිද්යාල යනු දැනුම ලබා දෙන, දැනුම බෙදා හරින, සොයාගැනීම්වලට අභියෝග කරමින් නව දැනුම සොයා යන අවකාශයක් වන බැවින් උසස් අධ්යාපනයට කෙරෙහි AI හේතුවෙන් ඇති වී ඇති බලපෑම අග්රාමාත්යවරිය තවදුරටත් සඳහන් කළා.
AI බලපෑම හේතුවෙන් සමාජ විද්යාව සහ මානව ශාස්ත්රවේදය වැනි ක්ෂේත්රයන් අභියෝගවලට ලක් වන බව පෙන්වා දුන් අග්රාමාත්යවරිය, මෙම ප්රතිපත්ති රාමුව විනය මූලික කරගත් ප්රතිපත්ති රාමුවක් ලෙස සකස් කළ යුතු බව අවධාරණය කරනු ලැබුවා.
ප්රතිපත්ති පුළුල් ලෙස සලකා බැලීමේ අවශ්යතාව පිළිබඳ අවධාරණය කළ අග්රාමාත්යවරිය, AI මඟින් අධ්යාපන පද්ධතිය තුළ පවතින අසමානතාවයන් තවදුරටත් වර්ධනය නොවීමට වගබලාගත යුතු බව අවධාරණය කළා.
මෙම AI ප්රතිපත්ති රාමුව හරහා ආබාධ සහිත සිසුන්ට සහාය වීම සහ භාෂා සම්බන්ධයෙන් පැන නැගී ඇති ගැටලු ආමන්ත්රණය කිරීම සඳහා තාක්ෂණය භාවිත කිරීම ඇතුළුව, ප්රතිපත්ති රාමුවෙහි පවතින දුර්වලතා මඟ හරවා ගනිමින් වඩාත් ඇතුළත් ඉගෙනුම් පරිසරයන් නිර්මාණය කිරීම සඳහා යොදා ගත යුතු බව අග්රාමාත්යවරිය තවදුරටත් පෙන්වා දුන්නා.
අධ්යයන කාර්ය මණ්ඩලය හා සිසුන් අතර සන්නිවේදනය සහ ක්රියාකාරකම් දිරිමත් කිරීම සඳහා මෙම AI ප්රතිපත්ති රාමුව ක්රියාත්මක කිරීමේදී උපදේශාත්මක ප්රවේශයක අවශ්යතාවය ද අග්රාමාත්යවරිය පෙන්වා දුන්නා ය. නිවැරදි භාවිතය අධ්යයන ප්රජාව අතර පවතින සංවාද සහ ප්රතිචාර දැක්වීම් මත රඳා පවතින බව අග්රාමාත්යවරිය තවදුරටත් සඳහන් කළා.
පර්යේෂණ සඳහා අවස්ථා ශක්තිමත් කිරීම සහ ගෝලීය තාක්ෂණික වෙනස්වීම්වලට ප්රතිචාර දැක්වීමේදී ශ්රී ලංකාව ක්රියාශීලීව ලෙස ප්රතිචාර දක්වන බව සහතික කිරීමේ අවශ්යතාවය පිළිබඳව ද අග්රාමාත්යවරිය මෙම සාකච්ඡාවේදී අවධානය යොමු කළ අතර කෘතිම බුද්ධියේ ප්රතිලාභ ඵලදායී ලෙස යොදා ගැනීම සඳහා දේශීය මට්ටමින් විශේෂඥතා දැනුම ලබා දීම සහ නැගී එන ප්රවණතාවලට අවස්ථා ලබා දීම වැදගත් වන බව අවධාරණය කළා.
AI ප්රතිපත්ති රාමුව හඳුන්වා දීම හරහා ශ්රී ලංකාවේ උසස් අධ්යාපන ක්ෂේත්රය තුළ කෘතිම බුද්ධිය සඳහා ව්යුහගත ප්රවේශයක අවශ්යතාවය පිළිබඳ පිළිබිඹු කරන අතර, වගකීම, සමානාත්මතාවය සහ දිගුකාලීන සමාජ බලපෑම සමඟ නවෝත්පාදනය තුලනය කිරීම කෙරෙහි අවධානය යොමු කරනවා.
