සිංහ – කැන්ගරු පළමු විස්සයි විස්ස ගැටුම අද රාත්‍රියේ

වත්මන් ලෝකශූර ඕස්ට්‍රේලියානු කණ්ඩායම සහ ශ්‍රී ලංකාව අතර තරග තුනකින් සමන්විත විස්සයි විස්ස තරගාවලිය අද (07) ආරම්භ වනවා.

කොළඹ ආර්. ප්‍රේමදාස ක්‍රීඩාංගනයේ දී අද ඇරඹෙන පළමු තරගය මෙරට වේලාවෙන් පස්වරු 7.30ට ආරම්භ කිරීමටයි සැලසුම්කර ඇත්තේ.

පළමු තරගය සඳහා එක්වන ඕස්ට්‍රේලියානු කණ්ඩායමේ ඊයේ (06) නිල වශයෙන් ප්‍රකාශයට පත්කළ ද අද තරගයට එක්වන ශ්‍රී ලංකා කණ්ඩායම තවමත් නම්කර නැහැ.

ආරොන් ෆින්ච් (නායක), ඩේවිඩ් වෝනර්, මිචෙල් මාෂ්, ග්ලේන් මැක්ස්වෙල්, ස්ටීවන් ස්මිත්, මාකස් ස්ටොයිස්, මැතිව් වේඩ්, ඇෂ්ටන් ඒගාර්, මිචෙල් ස්ටාර්ක්, කේන් රිචඩ්සන්, හේසල්වුඩ් අද තරගය සඳහා එක්වන ඕස්ට්‍රේලියානු කණ්ඩායමයි.

ක්‍රිකට් විචාරකයින් පවසන්නේ අද තරගය සඳහා පැතුම් නිස්සංක, ධනුෂ්ක ගුණතිලක, භානුක රාජපක්ෂ, කුසල් මෙන්ඩිස්, චරිත අසලංක, දසුන් ශානක (නායක), චාමික කරුණාරත්න, වනිඳු හසරංග, දුෂ්මන්ත චමීර, මහිෂ් තීක්ෂණ සහ නවක ක්‍රීඩක මතීෂ පතිරණ ක්‍රීඩා කරනු ඇති බවයි.

මෙම විස්සයි විස්ස තරගාවලියේ පළමු තරග දෙක කොළඹ ආර්. ප්‍රේමදාස ක්‍රීඩාංගනයේ දී පැවැත්වෙන අතර තුන්වන සහ අවසන් විස්සයි විස්ස තරගය පැවැත්වෙන්නේ පල්ලෙකැලේ ක්‍රීඩාංගනයේදී යි.

දෙරට අතර අවසන්වරට පසුගිය පෙබරවාරියේ පැවති විස්සයි විස්ස තරගාවලිය තරග හතරට එකක් ලෙස ජයගන්නට ඕස්ට්‍රේලියානු කණ්ඩායමට හැකියාව ලැබුණා.

අද තරගය සඳහා එක්ව සිටින ඩේවිඩ් වෝනර්, මිචෙල් මාෂ් සහ ජොෂ් හේසල්වුඩ් වැනි ක්‍රීඩකයින් නිමාවූ IPL තරගාවලියේ දක්ෂතා අතර සිටියා.

එමෙන්ම වනිඳු හසරංග, මහිෂ් තීක්ෂණ සහ භානුක රාජපක්ෂ ද නිමා වූ IPL තරගාවලියේ දී දක්ෂතා අතර සිටි ශ්‍රී ලංකා ක්‍රීඩකයින්.

ඒ අනුව අද ඇරඹෙන සිංහ – කැන්ගරු විස්සයි විස්ස ගැටුමේ ජය පැරදුම කෙසේ විසඳේවි ද යන්න ලොව පුරා සිටින ක්‍රිකට්ලෝලීන් දෑස් දල්වා බලා සිටිනවා.