නුවරඑළිය තැපැල් කාර්යාලයේ ඓතිහාසික උරුමය රැකගෙන සංචාරක ආකර්ෂණය ඉහළ නැංවීමට නව වැඩපිළිවෙළක් වශයෙන් සෞඛ්‍ය හා ජනමාධ්‍ය අමාත්‍ය නලින්ද ජයතිස්සගේ ප්‍රධානත්වයෙන් නව දෙමහල් ගොඩනැගිල්ලකට මුල්ගල් තබන්නට කටයුතු කර තිබෙනවා.
නුවරඑළිය නගරයේ ඓතිහාසික අනන්‍යතාව ආරක්ෂා කරමින් සංචාරක ආකර්ෂණය හා සංචාරක ව්‍යාපාරය තවදුරටත් ප්‍රවර්ධනය කිරීමේ අරමුණින් තැපැල් දෙපාර්තමේන්තුවේ යටිතල පහසුකම් සංවර්ධනය කිරීමේ වැඩපිළිවෙළ යටතේ නුවරඑළිය ප්‍රාදේශීය තැපැල් අධිකාරී කාර්යාලය සහ තැපැල් මෙහෙයුම් අංශය සඳහා නව දෙමහල් ගොඩනැගිල්ලක් ඉදිකිරීමට නියමිතයි.
එහි මුල්ගල් තැබීමේ උත්සවය සෞඛ්‍ය හා ජනමාධ්‍ය අමාත්‍ය වෛද්‍ය නලින්ද ජයතිස්ස මහතාගේ ප්‍රධානත්වයෙන් නොවැම්බර් 05 වැනිදා නුවරඑළියේදී පැවැත්වුණා.
ශ්‍රී ලංකා රජයේ මූල්‍ය ප්‍රතිපාදන යටතේ ශ්‍රී ලංකා තැපැල් දෙපාර්තමේන්තුව මගින් ක්‍රියාත්මක කරනු ලබන මෙම ව්‍යාපෘතියේ මුල්ගල් තැබීම සර්ව ආගමික නායකයන්ගේ ආශීර්වාදය මධ්‍යයේ සිදු කෙරුණා.
මෙහිදී අදහස් දැක්වූ සෞඛ්‍ය හා ජනමාධ්‍ය අමාත්‍ය වෛද්‍ය නලින්ද ජයතිස්ස පෙන්වා දුන්නේ, නුවරඑළිය තැපැල් කාර්යාලය යනු හුදෙක් තැපැල් සේවා සපයන රාජ්‍ය ආයතනයක් පමණක් නොව, නුවරඑළිය නගරයේ ඓතිහාසික උරුමය හා බැඳුණු සුවිශේෂී ගොඩනැගිල්ලක් බවයි.
යටත්විජිත සමයේ ඉදිකරන ලද මෙම ඓතිහාසික තැපැල් කාර්යාලය වසර ගණනාවක් පුරා දේශීය හා විදේශීය සංචාරකයන්ගේ අවධානය දිනාගත් නුවරඑළියේ ප්‍රධාන සංචාරක සලකුණක් බවත්, එහි ඓතිහාසික වටිනාකම හා ගෘහ නිර්මාණ අනන්‍යතාව ආරක්ෂා කිරීම අත්‍යවශ්‍ය බවත් අමාත්‍යවරයා අවධාරණය කළා.
තැපැල් දෙපාර්තමේන්තුවේ පරිපාලන හා මෙහෙයුම් කටයුතු වඩාත් විධිමත් කිරීම සඳහා අවශ්‍ය නව පහසුකම් සැලසීමත් සමඟ නුවරඑළියේ ඓතිහාසික තැපැල් කාර්යාලය හා ඒ අවට පරිශ්‍රය සංචාරක ආකර්ෂණය තවදුරටත් ඉහළ නැංවීමට දායක කරගැනීම රජයේ අරමුණ බවද අමාත්‍යවරයා පැහැදිලි කළා.
නුවරඑළිය යනු දෙස් විදෙස් සංචාරකයන් විශාල පිරිසක් වාර්ෂිකව පැමිණෙන සංචාරක පුරවරයක් බැවින් එහි පවතින ඓතිහාසික ගොඩනැගිලි, පරිසරය හා අනන්‍යතාව ආරක්ෂා කරමින් සංචාරකයන්ට ආකර්ෂණීය අත්දැකීම් ලබාදිය හැකි පරිසරයක් නිර්මාණය කිරීමේ අවශ්‍යතාවද අමාත්‍යවරයා මෙහිදී පෙන්වා දුන්නා.
.
මෙම අවස්ථාවට සෞඛ්‍ය හා ජනමාධ්‍ය අමාත්‍ය වෛද්‍ය නලින්ද ජයතිස්ස , තැපැල්පති එස්.ආර්.ඩබ්ලිව්.එම්.ආර්.පී. සත්කුමාර , නුවරඑළිය දිස්ත්‍රික් ලේකම් ආර්.ඒ.ඩී.ටී.එන්. තෙන්නකෝන් , අධ්‍යාපන හා උසස් අධ්‍යාපන නියෝජ්‍ය අමාත්‍ය මධුර සෙනෙවිරත්න සහ නුවරඑළිය මහ නගර සභාවේ නගරාධිපති උපාලි වනිගසේකර ඇතුළු රාජ්‍ය නිලධාරීහු, සර්ව ආගමික නායකයෝ සහ ආරාධිතයෝ රැසක් සහභාගි වුණා.
