ත්රිකුණාමලය පොලිස් වසමේ අනුරාධපුර හන්දිය ආසන්නයේ පිහිටි රට බීම හලකට ඇතුළු වූ පුද්ගලයින් දෙදෙනෙකු විසින් ටී 56 වර්ගයේ ගිනි අවියක් පෙන්වා බිය ගන්වා මුදල් කොල්ලකෑමක් සිදුකර පලා ගොස් ඇති බව පොලිසිය පවසනවා.
ඒ අනුව සිදු කළ විමර්ශනයක් මඟින් මෙම අපරාධය සිදුකල බවට සැකකරන පුද්ගලයින් දෙදෙනෙකු පැයක් වැනි කෙටි කාලයක් තුළ දී උප්පුවේලි පොලිස් වසමේ පිහිටි තාවකාලික නවාතැන්පලක සිටියදී පොලිසිය විසින් අත්අඩංගුවට ගෙන තිබෙනවා.
අත්අඩංගුවට ගත් එක් සැකකරුවෙකු උප්පුවේලි පොලිස් ස්ථානයට අනුයුක්තව කිලිපුංචිමලේ ප්රදේශයේ පිහිටි වෙඩි බෙහෙත් ගබඩාවක රාජකාරි කරනු ලබන පොලිස් සැරයන්වරයෙකු බවයි වාර්තා වන්නේ.
සැකකරුවන් අවුරුදු 54 හා 61 වයස්වල පසුවන හක්මන ප්රදේශයේ පදිංචිකරුවන්.
සැකකරුවන් සන්තකයේ තිබූ කොල්ලකන ලද බවට සැක කරන මුදල් රුපියල් 11500/=ක්(එකලොස්දහස් පන්සීයක්)ද, සැකකරුවන් පැමිණි යතුරු පැදියද, ටී 56 ගිනි අවියක් හා එම පතරොම් 29ක් අඩංගු පතරොම් ගැබක්ද පොලිස් භාරයට ගෙන තිබෙනවා.
ත්රිකුණාමලය පොලිසිය වැඩිදුර විමර්ශන සිදු කරගෙන යනු ලබනවා.
