බාහිර ආයෝජකයින් සම්බන්ධ කරගනිමින් ක්රියාත්මක කිරීමට යෝජනා කර තිබූ මතභේදාත්මක නව පුද්ගලික ආයෝජක සැලැස්ම අවලංගු කළ බව ෆීෆා සභාපති ගියානි ඉන්ෆැන්ටිනෝ පවසනවා.
අදාළ සැලැස්මට එල්ල වූ විරෝධය හේතුවෙන් එය හකුලා ගැනීමට සිදු වූ බවයි ෆීෆා සභාපතිවරයා සඳහන් කරන්නේ.
ලෝක කුසලානය ඇතුළු අනෙකුත් ප්රධාන තරගාවලි පවත්වාගෙන යාම වෙනුවෙන් ඩොලර් බිලියන 20ක වටිනාකමකින් යුත් නව අනුබද්ධිත ආයතනයක් පිහිටුවීමට යෝජනා වී තිබූ අතර, එහි 20%ක කොටස් බාහිර ආයෝජකයින්ට විකිණීමටයි සැලැස්ම වී තිබුණේ.
කෙසේ වෙතත් සාමාජිකයින් 55 දෙනෙකුගෙන් සමන්විත යුරෝපීය පාපන්දු සංගමය පවසා තිබුණේ, මෙම නව යෝජනාව ක්රියාත්මක කළහොත් එළැඹෙන ලෝක කුසලාන තරගාවලිය වර්ජනය කරන බවයි.
මේ අතර ෆීෆා හි ප්රධාන මෙහෙයුම් නිලධාරී කෙවින් ලැමූර් පැවසුවේ පාලක මණ්ඩලයේම පරිපාලනය මෙම ව්යාපෘතිය සම්බන්ධයෙන් රැවටීමට ලක්ව ඇති බවයි.
එමෙන්ම ගෝලීය උපාය මාර්ග සහ පාලනය පිළිබඳ ඉන්ෆැන්ටිනෝගේ ජ්යෙෂ්ඨ උපදේශක කාලෝස් කෝඩෙයිරෝ මෙම කාරණය සම්බන්ධයෙන් ඉල්ලා අස්වූ අතර, මෙම යෝජනාව පාපන්දු සඳහා නරක ගනුදෙනුවක් බවත් එය පාපන්දු අනාගතය උකස් කරනු ඇති බවත් ඔහු පැවසුවා.
මාර්තු මාසයේ පැවැත්වෙන ෆීෆා සම්මේලනයේදී සිව්වන වරටත් සභාපති ධුරයට තේරී පත්වීමට උත්සාහ කරන වත්මන් සභාපති ගියානි ඉන්ෆැන්ටිනෝ මෙම වාතාවරණය හමුවේ දැඩි පීඩනයක ලක්ව සිටිනවා.
