එප්පාවල ප්රදේශයේ ජංගම දුරකථන අලෙවිසැලකින් රුපියල් ලක්ෂ 10කට අධික වටිනාකමකින් යුත් ජංගම දුරකථන, උපාංග සහ මුදල් සොරාගත් වයස අවුරුදු 14ක බාලවයස්කරුවන් දෙදෙනෙක් පොලිසිය විසින් අත්අඩංගුවට ගෙන තිබෙනවා.
මෙම බාලවයස්කරුවන් දෙදෙනා පසුගිය 04 වනදා අලුයම් කාලයේ එප්පාවල නගරයේ බස් නැවතුම්පොළ අසල පිහිටි ජංගම දුරකථන අලෙවිසැලක ඉදිරිපස වීදුරුව බිඳ දමා ඊට ඇතුළු වී මෙම සොරකම සිදුකර ඇති බවයි අනාවරණය වී ඇත්තේ.
මෙම සොරකම සම්බන්ධයෙන් පොලිසිය විසින් විමර්ශන සිදුකළ පොලිසිය ඊයේ (17) දිනයේ මෙම සැකකරුවන් දෙදෙනා අත්අඩංගුවට ගෙන තිබෙනවා.
එප්පාවල ශ්රී සුදර්ශනාරාම පිරිවෙනේ නේවාසිකව අධ්යාපනය ලබන මෙම බාල වයස්කරුවන් දෙදෙනා තලාව, නබඩවැව සහ එප්පාවල, රොටවැව යන ප්රදේශවල පදිංචිකරුවන් බවයි වාර්තා වන්නේ.
මොවුන් දෙදෙනා අත්අඩංගුවට ගන්නා අවස්ථාවේ දී ලද රුපියල් ලක්ෂ 10කට අධික වටිනාකමකින් යුත් ස්මාර්ට් වර්ගයේ ජංගම දුරකථන 06ක් සහ රුපියල් 5000ක මුදලක් සොයාගෙන තිබෙනවා.
මෙම සැකකාර සිසුවෙක් අදාළ වෙළඳසැලට පෙර දිනක පැමිණ, ඇපල් වර්ගයේ ජංගම දුරකථනයක මිල ගණන් විමසා ඇති බවට අනාවරණය වී තිබෙනවා.
එම දුරකථනය මිලදී ගෙන දෙන ලෙස සිය පියාගෙන් ඉල්ලා ඇති අතර, පියා විසින් එම ඉල්ලීම ප්රතික්ෂේප කිරීම මත මෙලෙස ජංගම දුරකථන සොරාගෙන ඇති බවයි හෙළිව ඇත්තේ.
එලෙස සොරාගත් ජංගම දුරකථන වලින් දුරකථන දෙකක් තම පාවිච්චිය සඳහා සැකකාර බාලවයස්කරුවන් දෙදෙනා තබාගෙන, අනෙක් ජංගම දුරකථන පිරිවනේ හිමිනමකට සහ තවත් සිසුන් කීපදෙනෙකුට බෙදා දී තිබෙනවා.
සොරාගත් එක් ජංගම දුරකතනයක් මොවුන් විසින් විහාරස්ථානයේ හිමිනමකගේ සිම්පතක් යොදාගෙන භාවිත කර ඇති අතර, ඒ ඔස්සේ අදාළ සැකකරුවන් හඳුනා ගැනීමට පොලිසිය හැකිව තිබෙනවා..
අත්අඩංගුවට ගත් සැකකාර සිසුන් දෙදෙනා සහ නඩු භාණ්ඩ ද සමඟ අද (18) දින තඹුත්තේගම මහේස්ත්රාත් අධිකරණය වෙත ඉදිරිපත් කිරීමට නියමිතයි.
