මධ්‍යම අධිවේග මාර්ගයට අනවසරයෙන් ඇතුළු කළ යතුරුපැදියක් සහ මෝටර් රථයක් ගැටීමෙන් ඊයේ (24) සිදුවූ මාරක අනතුරෙන් පසු මෝටර් රථයේ ගමන් කළ 3 දෙනෙකු පළාගොස් තිබේ.
ඉදිකෙරෙමින් පවතින මධ්‍යම අධිවේග මාර්ගයේ 59 වන කිලෝමීටර් කණුව අසලදී එම අනතුර සිදුව තිබුණි.
අනතුරත් සමග යතුරුපැදිය සහ මෝටර් රථය ගිනිගෙන විනාශ විය.
යතුරුපැදියේ ගමන් කළ තරුණයින් දෙදෙනා අනතුරෙන් මිය ගොස් තිබූ බවද පොලීසිය පැවසීය.
සිද්ධිය සම්බන්ධයෙන් මෝටර් රථයේ ගමන් කළ පුද්ගලයින් 5 දෙනාගෙන් දෙදෙනෙකු අත්අඩංගුවට ගත් බව ජ්‍යෙෂ්ඨ නියෝජ්‍ය පොලිස්පති අජිත් රෝහණ මහතා පවසයි.
සිද්ධියෙන් පසු පැනගිය තිදෙනා අත්අඩංගුවට ගැනීමට විශේෂ පොලිස් කණ්ඩායමක් විමර්ශන සිදුකරන බවද අජිත් රෝහණ මහතා සඳහන් කළේය.
ඒ අනුව ඉදිකෙරෙමින් පවතින අධිවේගී මාර්ගයට ඇතුල් කරන වාහන පොලිස් භාරයට ගෙන එහි හිමිකරුවන්ට නඩු පැවරීමට කටයුතු කරන බවද පොලිස් මාධ්‍ය ප්‍රකාශකවරයා සඳහන් කරයි.
