ඉන්දියානු අග්රාමාත්ය නරේන්ද්ර මෝදි එළඹෙන ජූලි මාසයේදී නවසීලන්තයේ නිල සංචාරයක නිරත වීමට නියමිත බව විදෙස් මාධ්ය වාර්තා කරනවා.
මෙය ඔහුගේ පළමු නවසීලන්ත සංචාරය වනවා.
පසුගිය මාසයේදී දෙරට අතර අත්සන් කරන ලද ඓතිහාසික වෙළඳ ගිවිසුම මෙම සංචාරයේ ප්රධාන පසුබිමයි.
මෙම ගිවිසුම මඟින් නවසීලන්තයේ අපනයනවලින් සියයට 95ක් සඳහා පනවා තිබූ තීරුබදු ඉවත් කිරීමට හෝ අඩු කිරීමට පියවර ගෙන තිබෙනවා.
මේ යටතේ බැටළු මස්, ලොම්, වන වගා නිෂ්පාදන සහ මුහුදු ආහාර සඳහා වන බදු වහාම ක්රියාත්මක වන පරිදි හෝ කෙටි කාලීනව විශාල ලෙස කපා හැරුණා.
මෙතෙක් කල් ඉන්දියාව පනවා තිබූ ඉහළ තීරුබදු හේතුවෙන් නවසීලන්තයට ඉන්දීය වෙළඳපොළ අහිමි වී තිබුණද, නව බදු සහන හරහා දෙරට අතර වාණිජමය සබඳතා දැඩි ලෙස ශක්තිමත් වන බවයි විදෙස් මාධ්ය වාර්තා වල සඳහන් වුණේ.
මෙම ගිවිසුම සහ මෝදිගේ ඉදිරි සංචාරය දෙරටේ ආර්ථික සබඳතාවල නව පරිච්ඡේදයක් සනිටුහන් කරනු ඇතැයි සඳහන්.
