අකුරැස්ස, පෝරඹ පටුමග ප්රදේශයේ නිවසක පෙරේදා (14) දිනයේ දී පැවති අවුරුදු සාදයක් නිමවා රාත්රී 07.30ට පමණ සිය නිවෙස්වලට යාමට පැමිණි පුද්ගයන් අටදෙනෙක් සැකපිට අත්අඩංගුවට ගෙන එම පිරිස අතර සිටි තිදෙනෙක් සන්තකයේ තිබූ තිබූ රුපියල් ලක්ෂ පහකට ආසන්න මුදලක් අකුරැස්ස පොලිසියේ අවිගත් නිළධාරින් පිරිසක් මංකොල්ල කෑ බව චෝදනා එල්ලවනවා.
අත්අඩංගුවට ගැනීමට පැමිණි අවස්ථාවේ එලෙස පැමිණ ඇත්තේ මංකොල්ලකරුවන් පිරිසක් බවට සිතූ සාදයේ සිටි පිරිස ඔවුන් සන්තකයේ මුදල් සහ රන් භාණ්ඩ පවතින නිසාවෙන්, ඒ සම්බන්ධයෙන් බියට පත්ව දිව යාමට උත්සහ කර තිබෙනවා.
කෙසේ වෙතත් එලෙස දිව යන අවස්ථාවේ දී පිරිසක් පොලිස් නිලධාරීන්ට හසු වී ඇති අතර එවිට ඔවුන්ට පහර දී ඇති බවටත් තොරතුරු වාර්තා වනවා.
පොලිස් නිළ ඇඳුමෙන් පවා නොමැති සිටි නිළධාරින් සිව්දෙනෙක් විසින් මෙම අත්අඩංගුවට ගැනීම සිදුකර ඇති අතර අත්අඩංගුවට ගන්නා අවස්ථාවේ දී ඔවුන් සතුව තිබූ මුදල් එම නිලධාරීන් සිය භාරයට ගෙන ඇති අතර, පසුව එම ස්ථානයේ තිබූ වෑන් රථයකට නංවා ගෙන අදාළ අත්අඩංගුවට ගත් පිරිස අකුරුස්ස පොලිසිය වෙත රැගෙන ගිය බවයි පැවසෙන්නේ.
කෙසේ වෙතත් පසුව ඇප ලබා පොලිසියෙන් පිටතට පැමිණීමේ දී අත්අඩංගුවට ගත් අවස්ථාවේ ලබා ගත් මුදල්වලින් සුළු කොටසක් පමණක් ලබා දුන් බවත් මේ සම්බන්ධයෙන් කිසිවෙකුටත් නොකියන ලෙසට ද බිය ගැන්වූ බවත්, සිද්ධියට මුහුණදුන් පිරිස පවසනවා.
wpDiscuz
