රුපියල් එක් කෝටි විසිතුන් ලක්ෂ තිස්දහසක් වටිනා කොකේන් මත්ද්‍රව්‍ය තොගයක් සිය සිරුරේ සඟවා ගෙන මෙරටට පැමිණි විදෙස් ජාතික කාන්තාවක් අද (12) උදෑසන කටුනායක ගුවන් තොටුපොළේ දී අත්අඩංගුවට ගෙන තිබෙනවා.
කටුනායක ගුවන් තොටුපොළ පැමිණීමේ පර්යන්තයේ දී මෙලෙස අත්අඩංගුවට ගෙන ඇත්තේ 47 හැවිරිදි උගන්ඩා ජාතික කාන්තාවක්.
මෙම කාන්තාව උගන්ඩාවේ කම්පාලා නුවරින් කටාර් රාජ්‍යයේ දෝහා වෙත පැමිණ එතැන් සිට කටාර් ගුවන් සේවයේ කිව්.ආර්.- 664 දරණ ගුවන් යානයෙන් කටුනායක වෙත අද (12) උදෑසන 09.30ට පැමිණ තිබෙනවා.
මෙම කාන්තාව පිළිබඳව රේගු මත්ද්‍රව්‍ය පාලන අංශයේ නිලධාරීන් වෙත ලැබී තිබූ බුද්ධි තොරතුරු සහ අවදානම් විශ්ලේෂණය කරමින් මෙම අත්අඩංගුවට ගැනීම සිදුකර ඇති බවයි වාර්තා වුණේ.
අත්අඩංගුවට ගැනුණු ඇය පූර්ණ වශයෙන් විශේෂ පරීක්ෂාවකට ලක් කර ඇති අතර, එහිදී කරල් ලෙස සකසා ඇය සිය සිරුරෙහි සඟවා ගෙන තිබූ කොකේන් මත්ද්‍රව්‍ය ග්‍රෑම් 274ක් සොයාගැනීමට හැකිව තිබෙනවා.
එමෙන්ම තවත් කොකේන් මත්ද්‍රව්‍ය ගුලි ලෙස සකස් කර ගිලදමා ඇති බවට රේගු මත්ද්‍රව්‍ය පාලන අංශයේ නිලධාරීන් සැක පහළ කරනවා.
ඒ, අනුව මෙම උගන්ඩා ජාතික කාන්තාව වෛද්‍ය ප්‍රතිකාර සහ නීතිමය ක්‍රියාමාර්ග සදහා කටුනායක ගුවන් තොටුපොළ පොලිස් මත්ද්‍රව්‍ය කාර්යාංශයේ නිලධාරීන් වෙත භාරදීමට පියවර ගෙන තිබෙනවා.
