පාර්ලිමේන්තුව අප්රේල් 07, 09 සහ 10 දිනවල රැස්වීමට නියමිත බව පාර්ලිමේන්තුවේ මහ ලේකම් කුෂානි රෝහණදීර සඳහන් කළා.
කතානායක වෛද්ය ජගත් වික්රමරත්නගේ ප්රධානත්වයෙන් පසුගිය 19 වනදා පැවති පාර්ලිමේන්තු කටයුතු පිළිබඳ කාරක සභා රැස්වීමේ දී මෙම පාර්ලිමේන්තු කටයුතු තීරණය කර තිබෙනවා.
පාර්ලිමේන්තුව රැස්වන මෙම දින තුනේම පෙ.ව 9.30 – පෙ.ව. 10.00 කාලය ස්ථාවර නියෝග 22හි 1 සිට 6 දක්වා සඳහන් පාර්ලිමේන්තු කටයුතු සඳහා වෙන්කර තිබෙනවා.
පෙ.ව 10.00 – 11.00 කාලය වාචික පිළිතුරු අපේක්ෂා කරන ප්රශ්න සඳහා වෙන් කර ඇති අතර, පෙ.ව. 11.00 -11.30 කාලය ස්ථාවර නියෝග 27(2) යටතේ ප්රශ්න සඳහා වෙන් කර ඇති බව සඳහන්.
ඒ, අනුව 2026 අප්රේල් 07 වැනි අගහරුවාදා පෙ.ව. 11.30 සිට ප.ව 4.45 දක්වා ක්රීඩාවල යෙදීමේදී උත්තේජක ද්රව්ය ගැනීමට එරෙහි සම්මුති පනත යටතේ නියෝග, ක්රමෝපාය සංවර්ධන ව්යාපෘති පනත යටතේ නියෝග සහ ශ්රී ලංකා මහ බැංකු පනත යටතේ රීති විවාදයට ගැනීමට නියමිතයි.
තවද, 2026.03.17 දින පළමුවර කියවීම සඳහා පාර්ලිමේන්තුවට ඉදිරිපත් කළ දේශීය ආදායම් (සංශෝධන) පනත් කෙටුම්පත සහ සමාජ ආරක්ෂණ දායකත්ව බදු (සංශෝධන) පනත් කෙටුම්පත යන පනත් කෙටුම්පත් ද්විත්වය ද ආණ්ඩුක්රම ව්යවස්ථාවේ 121 ව්යවස්ථාව ප්රකාරව ශ්රේෂ්ඨාධිකරණය ඉදිරියේ අභියෝගයට ලක් නොවුණහොත් මෙදින දෙවනවර කියවීමට තීරණය වී තිබෙනවා.
අනතුරුව ප.ව 4.45 සිට ප.ව 5.30 දක්වා පාර්ලිමේන්තුවේ ස්ථාවර නියෝග සංශෝධනය කිරීම විවාදයට ගෙන අනුමත කිරීමටයි නියමිතව ඇත්තේ.
එමෙන්ම ප.ව 5.30 ලංකා ධීවර සංස්ථාවේ වාර්ෂික වාර්තාව විවාදයකින් තොරව අනුමත කිරීමට නියමිතව තිබෙනවා.
අප්රේල් 08 වන බදාදා රජයේ නිවාඩු දිනයක් බැවින් එදින පාර්ලිමේන්තු රැස්වීම් පැවැත්වෙන්නේ නැහැ.
2026 අප්රේල් 9 වැනි බ්රහස්පතින්දා පෙ.ව 11.30 සිට ප.ව 2.00 දක්වා (357 අධිකාරය වූ) යුද්ධ හමුදා පනත යටතේ නියෝග, (358 අධිකාරය වූ) නාවික හමුදා පනත යටතේ නියෝග සහ (359 අධිකාරය වූ) ගුවන් හමුදා පනත යටතේ නියෝග විවාදයට ගැනෙනවා.
තවද මහජන ආරක්ෂක ආඥා පනත යටතේ සහ අත්යවශ්ය මහජන සේවා පනත යටතේ ජනාධිපතුමා විසින් ප්රකාශන පළ කරනු ලැබුවහොත් ඊට අදාළ වූ යෝජනා සම්මත ද්විත්වය ද මෙදින විවාදයට ගැනීමට තීරණය වී තිබෙනවා.
ඉන්පසු ප.ව 2.00 සිට ප.ව 5.30 දක්වා විපක්ෂය විසින් ගෙනෙනු ලබන යෝජනාවට අනුව 2019 අප්රේල් 21 දින සිදු වූ පාස්කු ඉරිදා ප්රහාරය පිළිබඳ සභාව කල්තැබීමේ විවාදය පැවැත්වීමටත් මෙහිදී එකඟත්වය පළ වී තිබෙනවා.
2026 අප්රේල් 10 වැනි සිකුරාදා පෙ.ව 11.30 සිට ප.ව 5.30 දක්වා බලශක්ති අමාත්ය කුමාර ජයකොඩි මහතාට එරෙහිව විපක්ෂය විසින් ඉදිරිපත් කර ඇති විශ්වාසභංග යෝජනාව විවාදයට ගැනීමටත් මෙහිදී තීරණය කර ඇති බව සඳහන්.
