ඇවන්ගාඩ් මැරිටයිම් සර්විසස් (Avant-Garde Maritime Services) සමාගම සහ එහි සේවකයින් විසින් ගොනු කරන ලද රිට් පෙත්සම් දෙකක් විධිමත් විභාගයකින් තොරවම ප්රතික්ෂේප කිරීමට අභියාචනාධිකරණය අද ( 25 ) නියෝග කළා.
මෙම පෙත්සම් මගින් ඇවන්ගාඩ් සමාගම ඉල්ලා සිටියේ ආරක්ෂක අමාත්යාංශයේ ලේකම්වරයා විසින් නිකුත් කරන ලද නියෝගයක් බලරහිත කරන ලෙසයි.
අදාළ නියෝගය මගින් සමාගම විසින් මෙතෙක් පවත්වාගෙන ගිය අවි ගබඩා තුනක් ඉවත් කිරීමට පියවර ගෙන තිබුණා.
එම අවි ගබඩා යොදාගෙන තිබුණේ මෙරට සාගර සීමාව පසු කරන නෞකාවලට මුහුදු කොල්ලකාර කණ්ඩායම්වලින් ආරක්ෂාව සැපයීමේ කොන්ත්රාත් ලබා දීමයි.
අභියාචනාධිකරණයේ විනිසුරු සභාපති රොහාන්ත අබේසුරිය සහ ප්රියන්ත ප්රනාන්දු යන මහත්වරුන්ගෙන් සමන්විත විනිසුරු මඩුල්ල මෙම තීන්දුව ලබා දුන්නේ පෙත්සම් පිළිබඳ මූලික සලකා බැලීමකින් අනතුරුවයි.
සිය ව්යාපාරික කටයුතුවලට එමගින් බලපෑමක් සිදුවන බව පෙත්සම්කරුවන්ගේ තර්කය වී තිබුණා.
මෙම පෙත්සම් දෙක මූලික වශයෙන් සලකා බැලූ අභියාචනාධිකරණ විනිසුරු මඩුල්ල , ඒවා විභාගයට ගැනීමට තරම් ප්රමාණවත් නීතිමය පදනමක් නොමැති බව තීරණය කරමින් ඉවත දැමීමට නියෝග කළා.
ඒ අනුව ආරක්ෂක අමාත්යාංශය විසින් ලබා දුන් එම නියෝගය තවදුරටත් වලංගු වනවා.
එහිදී කරුණු කිහිපයක් කෙරෙහි අවධානය යොමු වුණා.
- 2025 අගෝස්තු මස නිකුත් කළ අතිවිශේෂ ගැසට් නිවේදනය මගින් නාවික ආරක්ෂක සේවා (OBST) පූර්ණ වශයෙන් ශ්රී ලංකා නාවික හමුදාව වෙත පවරා තිබීම.
- නාවික පනතේ 21 වැනි වගන්තිය යටතේ ජනාධිපතිවරයා සතු බලතල ප්රකාරව මෙම කටයුතු “නාවික නොවන රාජකාරි” ලෙස රජය යටතට පවරා ගැනීම නීත්යානුකූල බව තහවුරු වීම.
ආරක්ෂක අමාත්යාංශයේ තීරණය අත්හිටුවීමට තරම් ප්රමාණවත් නීතිමය පදනමක් පෙත්සම්කරුවන් විසින් ඉදිරිපත් කර නොමැති බව අධිකරණයේ නිගමනය වුණා.
ගෝඨාභය රාජපක්ෂ පාලන සමයේදී ඇවන්ගාඩ් සමාගම වෙත මෙම මෙහෙයුම් කටයුතු භාර දීමෙන් ඔවුන් අතිවිශාල සහ අසාධාරණ ලාභයක් ලබාගෙන තිබුණා.
මෙය ශ්රී ලංකා නාවික හමුදාවට විශාල ආදායම් අහිමිවීමක්ව තිබුණා.
රජයේ නවතම දත්ත වාර්තාවලට අනුව, 2025 ඔක්තෝබර් මස සිට නාවික හමුදාව මෙම මෙහෙයුම් සෘජුවම සිදු කිරීම ආරම්භ කිරීමෙන් පසු ලැබුණු සමස්ත ආදායම රජයේ ඒකාබද්ධ අරමුදලට බැර කර තිබෙනවා.
මෙම තීන්දුවත් සමඟ ඇවන්ගාඩ් සමාගම රජයට ගෙවීමට ඇති බව පැවසෙන රුපියල් මිලියන 782 ක හිඟ මුදල අයකර ගැනීමට රජය විසින් නීතිමය පියවර ගනු ඇතැයි අපේක්ෂා කෙරේ. මීට අමතරව ඉදිරියේදී ඇවන්ගාඩ් සමාගම විසින් සිදුකර ඇති පාඩුව සහ වංචා දූෂණ පිළිබද විමර්ශන සිදු කරනු ඇතැයිද අපේක්ෂා කෙරෙනවා.
එසේම, ජාත්යන්තර නෞකා සමාගම් දැන් සෘජුවම ශ්රී ලංකා නාවික හමුදාව සමඟ ගනුදෙනු කිරීමට බැඳී සිටිනවා.
