ATM හොරෙක් අල්ලන්න පොලිසිය මහජන සහාය පතයි

මුදල් වංචා කිරීමක් සම්බන්ධයෙන් අවශ්‍ය කරන සැකකරුවෙක් අත්අඩංගුවට ගැනීමට පොලිසිය මහජනතාවගේ සහාය ඉල්ලා සිටිනවා.

පොළොන්නරුව, ජයන්තිපුර ප්‍රදේශයේ පදිංචි පුද්ගලයෙකු කළුතර දකුණ පොලිස් ස්ථානය වෙත පැමිණ තමා, 2025.08.19 වන දින කළුතර නගරයේ පිහිටි බැංකුවක ATM යන්ත්‍රයෙන් මුදල් ලබා ගැනීම සඳහා පැමිණි බවත්, එහි සිටි තමා නොහඳුනන පුද්ගලයෙකුගෙන් සහාය ලබා ගත් බවත්, එම අවස්ථාවේදී එම පුද්ගලයාට තමාගේ ATM කාඩ්පත හා මුරපදය ලබා දුන් බවටත් එහිදී එම අය විසින් වෙනත් ATM කාඩ්පතක් තමාට ලබා දී පිටව ගොස් පසුව, තමාගේ ATM කාඩ්පත භාවිත කරමින් රුපියල් ලක්ෂ 02 ක මුදලක් ලබා ගෙන ඇති බවටත් පවසමින් පැමිණිල්ලක් ඉදිරිපත් කර තිබෙනවා.

මෙම සැකකරු මීට පෙරත් මේ ආකාරයෙන්ම මුදල් වංචා සිදුකිරීම සම්බන්ධයෙන් කළුතර දකුණ පොලිස් ස්ථානය හා වාද්දුව පොලිස් ස්ථානයට මෙවැනි පැමිණිලි 04 ක් වාර්තා වී ඇති අතර, මෙම සැකකරු දිවයිනේ විවිධ ස්ථානවලට ගමන් කරමින් නිරන්තරයෙන් මෙවැනි වංචා රැසක් සිදුකරන අයෙකු බවයි දැනට සිදුකරන ලද වැඩිදුර විමර්ශනයේදී අනාවරණය වී ඇත්තේ.

ඒ අනුව, සැකකරු සම්බන්ධයෙන් යම් තොරතුරක් වෙතොත් පහත සඳහන් දුරකථන අංක වෙත දැනුම් දෙන ලෙසයි පොලිසිය මහජනතාවගෙන් ඉල්ලා සිටින්නේ.

මූලස්ථාන ප්‍රධාන පොලිස් පරික්ෂක – කළුතර දකුණ – 071-8591691
ස්ථානාධිපති අපරාධ අංශය කළුතර දකුණ – 071-8594360