මතභේදාත්මක විනිසුරු තීරණයෙන් ශ්‍රී ලංකාවට අවසන් මහා තරගය ගිලිහෙයි

නැගීඑන ආසියානු කුසලාන තරගාවලියේ අවසන් මහා තරගයට පිවිසීමට තිබූ පහසු අවස්ථාව ඊයේ (21) රාත්‍රියේ ශ්‍රී ලංකා ‘A’ කණ්ඩායමෙන් ගිලිහී ගියා.

ඒ, මෙවර තරගාවලියේ දෙවන අවසන් පූර්ව තරගයේ දී පාකිස්ථාන ‘A’ කණ්ඩායම හමුවේ ලකුණු 05කින් පරාජය වීමත් සමඟයි.

මෙම තරගයේ දී පළමුව පන්දුවට පහර දුන් පාකිස්ථාන ‘A’ කණ්ඩායම නියමිත පන්දුවාර 20 තුළ කඩුලු 09ක් දැවී ලකුණු 153ක් රැස් කළා.

අනතුරුව ජයග්‍රහණය සඳහා ලකුණු 154ක ඉලක්කයක් හඹා යාමය පිටියට පිවිසි ශ්‍රී ලංකා පිතිකරුවන් අසරණ කළ පාකිස්ථාන පන්දු යවන්නන් ශ්‍රී ලංකා පිළිතුරු ඉනිම සුනු විසුණු කළා.

පිතිකරුවන්ගේ වගකීම් විරහිත පිතිකරණය හේතුවෙන් ශ්‍රී ලංකා ඉනිම 14 වන පන්දුවාරය අවසානයේ කඩුලු 08ක් බිඳවැටී ලකුණු 99ක් ලෙස අසීරු අඩියක පැවතියා.

වගකීම පැහැරහැරි පිතිකරුවන්ගේ වගකීම භාරගත් මිලාන් රත්නායක හා ට්‍රැවීන් මැතිව් 09වන කඩුල්ලට ලකුණු 47ක සබඳතාවක් ගොඩනඟමින් ශ්‍රී ලංකාවේ ජයග්‍රහණ බලාපොරොත්තු ඔසවා තැබුවා.

කෙසේ වෙතත් ශ්‍රී ලංකා කණ්ඩායමට අවසන් පන්දුවාර තුළ ලකුණු 15ක් අවශ්‍යව තිබූ අතර, එතෙක් ශ්‍රී ලංකාවේ බලාපොරොත්තුව වී සිටි මිලාන් රත්නායක විනිසුරුවරයාගේ මතභේදාත්මක තීරණයත් සමඟ දැවී යාම හේතුවෙන් තරගය පාකිස්ථානය දෙසට දෝලනය වුණා.

කඩුල්ල මුවකළ බවට විනිසුරුවරයා ලබාදුන් මතභේදාත්මක තීරණයෙන් දැවී යනවිට මිලාන් රත්නායක පන්දු 32ක් තුළ ලකුණු 40ක් රැස්කරගෙන සිටියා.

කෙසේ වෙතත් ශ්‍රී ලංකාවට නියමිත පන්දුවරට 20 තුළ ශ්‍රී ලංකාවට කඩුලු 09ක් දැවී රැස්කර ගත හැකිවුයේ ලකුණු 148ක් පමණයි.

ඒ, අනුව මෙම තරගය ලකුණු 05කින් ජයගත් පාකිස්ථානය අවසන් මහා තරගයට සුදුසුකම් ලබාගත්තා.