ඉන්දීය අගමැති නරේන්ද්ර මෝදි සහ බ්රිතාන්ය අගමැති කියර් ස්ටාර්මර් බ්රහස්පතින්දා වාණිජ සබඳතා පරිවර්තනය කිරීම සඳහා නුදුරේ දී අත්සන් තැබුණු වෙළඳ ගිවිසුමේ විභවය අගය කළා.
ජූලි මාසයේදී අත්සන් කරන ලද වෙළඳ ගිවිසුමේ ප්රතිලාභ අපේක්ෂාවෙන් ව්යාපාර, සංස්කෘතික සහ විශ්ව විද්යාල වැනි ක්ෂේත්ර රැසක ප්රධානීන් සියයකට වැඩි පිරිසක් සමඟ ස්ටාර්මර් ඉන්දියාවේ දෙදින සංචාරයක් සඳහා මුම්බායි හි මූල්ය අගනුවරට පැමිණ සිටිනවා.
රෙදිපිළි සිට විස්කි සහ මෝටර් රථ දක්වා භාණ්ඩ සඳහා තීරුබදු අඩු කිරීමට සහ ලෝකයේ පස්වන සහ හයවන විශාලතම ආර්ථිකයන්හි ව්යාපාර සඳහා වැඩි වෙළඳපල ප්රවේශයක් ලබා දීමට ගිවිසුම එකඟ වූ අතර, 2040 වන විට ද්විපාර්ශ්වික වෙළඳාම තවත් පවුම් බිලියන 25.5 කින් (ඩොලර් බිලියන 34) ඉහළ නැංවීම අරමුණු කර ගෙන සිටිනවා.
පෙර නොවූ විරූ විශාලතම ව්යාපාරික දූත පිරිස සමඟ ස්ටාර්මර්ගේ සංචාරය, හවුල්කාරිත්වයේ “නව ශක්තිය සහ පුළුල් දැක්ම පිළිබිඹු කරයි” යනුවෙන් බ්රිතාන්ය අග්රාමාත්යවරයා සමඟ සාකච්ඡා කිරීමෙන් පසු මෝදි පැවසුවා.
“ඉන්දියාවේ ගතිකත්වය සහ එක්සත් රාජධානියේ විශේෂඥතාව එක්ව අද්විතීය සහජීවනයක් නිර්මාණය කරයි,” මෝදි සඳහන් කළා.
“අපගේ හවුල්කාරිත්වය විශ්වාසය මත ගොඩනැගී ඇත … එය අපගේ ජාතීන් දෙකෙහිම ජනතාවට දීප්තිමත් අනාගතයක් ගොඩනැගීම සඳහා අපගේ හවුල් කැපවීම පැහැදිලිව නැවත තහවුරු කිරීමකි.” මෝදි වැඩිදුරටත් පැවසුවා.
වසරක් ඇතුළත ක්රියාත්මක වීමට නියමිත වෙළඳ ගිවිසුමේ විභවය දෙගුණ කිරීම කෙරෙහි තම සංචාරයේ අවධානය යොමු වූ බව ස්ටාර්මර් පැවසුවා.
“අපි අද රාත්රියේ ඉන්දියාවෙන් පිටත්ව යන විට, අනාගත අංශවල ඉහළ කුසලතා ඇති රැකියා දහස් ගණනක් නිර්මාණය කරමින් අපට ප්රධාන නව ආයෝජන ලබා ගත හැකි වනු ඇතැයි මම අපේක්ෂා කරමි.” ස්ටාමර් සඳහන් කළා.
එක්සත් ජාතීන්ගේ ආරක්ෂක මණ්ඩලයේ සාමාජිකයෙකු වීමේ නවදිල්ලියේ දිගුකාලීන ආශාවට ස්ටාර්මර් ද සහාය දක්වමින් කියා සිටියේ ඉන්දියාව එහි නිසි ස්ථානය ලබා ගත යුතු බවයි.
තාක්ෂණය, අධ්යාපනය, ආරක්ෂක සහ ආරක්ෂාව, AI සහ උසස් සන්නිවේදනයන්හි සහයෝගීතාව විශේෂ අවධානයක් යොමු කළ යුතු ක්ෂේත්ර ලෙස නායකයින් දෙපළ ලැයිස්තුගත කළා.
ස්ටාර්මර් පිටත්ව යෑමට පෙර නායකයින් දෙදෙනාම මූල්ය තාක්ෂණ සමුළුවකට සහභාගී වීමට ද නියමිතයි.
දියුණු නිෂ්පාදන, ඩිජිටල් වෙළඳාම, පිරිසිදු බලශක්තිය සහ සේවා වැනි අංශවල වඩාත් සමීපව කටයුතු කිරීමට බදාදා පැවති රැස්වීමකදී දෙරටේ වෙළඳ අමාත්යවරු එකඟ වූ බව ඉන්දියාවේ වාණිජ අමාත්යාංශය පැවසුවා.
