ජනපති පදවි ප්‍රාප්තියට අදට වසරයි

ශ්‍රී ලංකාවේ 09 වන විධායක ජනාධිපතිවරයා ලෙස දිසානායක මුදියන්සේලාගේ අනුර කුමාර දිසානායක තේරීපත් වී අදට වසරක් සපිරෙනවා.

2024 වසරේ සැප්තැම්බර් 21 වනදා ජනාධිපතිවරයා තෝරා පත්කරගැනීම වෙනුවෙන් පැවති ඡන්ද විමසීමේ දී ඡන්ද 5,634,915ක් ලබාගනිමින් අනුර කුමාර දිසානායක මෙරට 09 වන විධායක ජනාධිපතිවරයා තේරී පත් වුණා.

මෙම මැතිවරණයේ දී ඔහුගේ ප්‍රතිවාදියා වූ සජිත් ප්‍රේමදාස ඡන්ද 4,530,902ක් ලබා ගත්තා.

පුද්ගලයින් 5,634,915 දෙනෙකුගේ කැමැත්තෙන් තේරී පත් වූ මෙරට 09 වන විධායක ජනාධිපතිවරයා දිවුරුම්දීම සිදුකෙරුණේ 2024 වසරේ සැප්තැම්බර් 23 වනදායි.

ජනතා විමුක්ති මූලික කර ගනිමින් ගොඩනැඟූ ජාතික ජන බලවේගයෙන් තරග කර ජයග්‍රහණය කළ අනුර කුමාර දිසානායක ජනාධිපතිවරයා සැලකෙන්නේ වාමාංශික පක්ෂයකින් බිහි වූ මෙරට පළමු ජනාධිපතිවරයා ලෙසසයි.

ජනාධිපතිවරයා ලෙස තේරී පත්ව සිදුකළ සිය මංගල කතාවේ දී අනුර කුමාර දිසානායක ජනාධිපතිවරයා සඳහන් කළේ රට වෙනස් වීමට කාලයක් ගත වන බවත්, ජනවරම ලැයිස්තුගත කර ඇති කැපවීම් ඉටු කරන බවට පොරොන්දුවන බවයි.