ලොව බලගතුම පුද්ගලයා ලෙස තවමත් සැලකෙන ඇමෙරිකානු ජනාධිපතිවරයා සමග සමීපව සුහද කතාබහක නිරත වීම ඉතා දුර්ලභ අවස්ථාවක් ලෙසයි සැලකෙන්නේ.ලෝක නායකයන් පවා ඇතැම්විට ඇමෙරිකානු ජනාධිපතිවරයා හමුවීමට කාලය වෙන් කර ගන්නේ මහත් පරිශ්රමයක් දැරීමෙන් අනතුරුවයි.
එවන් තත්ත්වයක් තුල ශ්රී ලංකා නාවික හමුදාවේ විශ්ව ෆොන්සේකා, ඇමෙරිකානු ජනාධිපති ජෝ බයිඩ්න් හමුවීම බොහෝ දෙනෙකුගේ අවධානයට ලක් වුණා.
ශ්රී ලංකා නාවික හමුදාවේ උප ලුතිනන් විශ්ව ෆොන්සේකා එලෙස ජනපති බයිඩ්න් හමුවූයේ එක්සත් ජනපද වෙරළාරක්ෂක ඇකඩමියේ නාවික නිර්මාණ සහ ඉංජිනේරු ශිල්පය පිළිබඳ පළමු පන්තියේ ගෞරව උපාධි සහතිකය ලබා ගැනීමටයි.
විශ්ව ෆොන්සේකා ඇමෙරිකාවේ කනෙටිකට් – නිව් ලන්ඩන් හි වෙරළාරක්ෂක ඇකඩමියේ 140 වන උපාධි ප්රධානෝත්සවයේදී අදාළ ගෞරව උපාධිය ලබා ගත්තා.
ඔහු සමඟ ඊට එක්වූයේ වොෂින්ටනයේ ශ්රී ලංකා තානාපති කාර්යාලයේ ආරක්ෂක උපදේශක එයාර් කොමදෝරු සම්පත් වික්රමරත්නයි.
ඇමෙරිකානු ජනාධිපතිවරයා ප්රධාන ආරාධිතයා බවට පත්වූ මෙම උත්සව අවස්ථාවට ඇමෙරිකානු ස්වදේශ ආරක්ෂක ලේකම්වරයා මෙන්ම, ඇමෙරිකානු වෙරළාරක්ෂක බලකායේ අණදෙන නිලධාරි අද්මිරාල් කාල් ෂුල්ට්ස් ද එක්වුණා.
උපාධි සහතිකය ලබා ගැනීමට පැමිණි විශ්ව ෆොන්සේකා සමඟ ඇමෙරිකානු ජනාධිපතිවරයා කෙටි පිළිසඳරක යෙදීමට ද අමතක කළේ නැහැ.
මහනුවර කිංග්ස්වුඩ් විද්යාලයේ ආදි සිසුවෙකු වන විශ්ව නාවික හමුදාවට එක්වන්නේ 2015 වසරේදීයි.සිය පුතු ලද ජයග්රහණය පිළිබඳව අදහස් පළ කළ විශ්ව ෆොන්සේකාගේ මව වන ශ්රියානි සෙනෙවිරත්න පැවසුවේ මෙය තමන්ට සිහිනයක් මෙන් හැගෙන බවයි.
