චැම්පියන්ස් ලීග් 20-20 තරගාවලිය යළි කරළියට

චැම්පියන්ස් ලීග් විස්සයි විස්ස තරගාවලිය නැවත ආරම්භ කිරීමට නියමිත බවට තොරතුරු වාර්තා වනවා.

ජාත්‍යන්තර ක්‍රිකට් කවුන්සිලයේ සභාපති ජේ ෂාගේ සහාය ඇතිව චැම්පියන්ස් ලීග් 20-20 තරගාවලිය මෙලෙස ආරම්භ කිරීමට තීරණය කර ඇති අතර, මෙම තීරණයට එංගලන්ත සහ වේල්ස් ක්‍රිකට් මණ්ඩලයෙන් (ECB) සහ ඉන්දියාවේ ක්‍රිකට් පාලක මණ්ඩලයෙන් (BCCI) ද සහාය ලැබී තිබෙනවා.

The Cricketer පුවත්පතට අනුව, මෙම ශූරතාවලිය සඳහා දිනය ලබන වසරේ දී නියම කර ඇති අතර, එය ලෝක සමාජ ශූරතාවලිය ලෙස නැවත නම් කරනු ඇති බවයි වාර්තා වන්නේ.

ලොව ප්‍රමුඛ පෙළේ විස්සයි විස්ස ලීගවලින් ජයගත් කණ්ඩායම් මෙම තරගාවලිය වෙනුවෙන් ක්‍රීඩා කරන අතර, මෙය රසිකයින් අතර ඉතා ජනප්‍රිය තරගාවලියක් වනු ඇති බවයි ක්‍රීඩා මාධ්‍ය වාර්තා කරන්නේ.

The Cricketer හි වාර්තාවකට අනුව, ඉන්දීය ප්‍රිමියර් ලීග් (IPL), පකිස්ථාන සුපර් ලීග් (PSL), බිග් බෑෂ් ලීග් (BBL), SA20 සහ The Hundred වැනි ප්‍රධාන ලීගවල ෆ්‍රැන්චයිස් ශූරයන් යළි ආරම්භවන මෙම තරගාවලිය වෙනුවෙන් එක් වනු ඇති බවයි.