තවත් ඇඟලුම් කර්මාන්ත ශාලා දෙකකින් කොවිඩ් ආසාදිතයින් විශාල ප්‍රමාණයක් හඳුණාගෙන තිබෙනවා.
මෙම ගණන 617ක්.
ඒ අතර පානදුර ප්‍රදේශයේ ඇඟලුම් කර්මාන්ත ශාලාවක් ද තිබෙනවා.
එහි සේවකයින් 467 දෙනෙකු කොවිඩ් ආසාදිතයින් ලෙස හඳුණාගෙන ඇතැයි පැවසෙනවා.
අදාළ කර්මාන්ත ශාලාවේ සේවකයින් 2,000 ක පිරිසක් PCR පරීක්ෂණ සඳහා යොමු කර ඇති අතර ප්‍රදේශයේ සෞඛ්‍ය අංශ පැවසුවේ එහි දී මෙම ආසාදිතයින් හඳුණාගත් බවයි.
තවත් දහසකගේ පමණ PCR පරීක්ෂණ ප්‍රතිඵල මෙතෙක් ලැබී නොමැති බව ද එහෙයින් ආසාදිතයින් ගණන තව දුරටත් ඉහළ යා හැකි බව ද සෞඛ්‍ය අංශ සඳහන් කරනවා.
එමෙන්ම බණ්ඩාරගම ප්‍රදේශයේ කර්මාන්ත ශාලාවක 150 දෙනෙක් කොවිඩ් ආසාදිතයින් බවට හඳුනාගෙන ඇති බව බණ්ඩාරගම සෞඛ්‍ය වෛද්‍ය නිලධාරි වෛද්‍ය නිමේෂා රත්නවීර ප්‍රකාශ කළා.
මේ අතර තුල්හිරිය ප්‍රදේශයේ ඇඟලුම් කර්මාන්ත ශාලාවක 400 පිරිසක් කොවිඩ් ආසාදිතයින් බවට පත්වීම සම්බන්ධයෙන් කම්කරු දෙපාර්තමේන්තුව පරීක්ෂණයක් ආරම්භ කර ඇති බව කම්කරු කොමසාරිස් ප්‍රභාත් චන්ද්‍රකීර්ති පැවසුවා.
එම ආයතනය නිසි සෞඛ්‍ය ආරක්ෂිත ක්‍රමවේද අනුගමනය කළේ ද යන්න පිළිබඳව ද එහිදී සොයා බැලීමට නියමිතයි.
